ԵՐԵՎԱՆԻ ԺԱՄԱՆԱԿՈՎ. Մենք ունենք պատերազմից, մայրերի արցունքից, երեխաների արյունից փող աշխատող իշխանություն․ Արմեն Մարտիրոսյան

«2017-ը ակնհայտ ձեռքբերումների տարի էր, այն իմաստով, որ եթե մի օր ունենանք լեգիտիմ իշխանություն, կիմանանք, թե ինչպիսին չպետք է լինի այդ իշխանությունը, չպետք է խոստանա տիեզերք, եթե ինքը չունի «տիեզերական» արդյունաբերություն»,- նման տեսակետ է հայտնում «Անտարես» հրատարակչության տնօրեն Արմեն Մարտիրոսյանը՝ Factor.am-ի «Երևանի ժամանակով» զրուցաշարի շրջանակում։

Նրա խոսքով՝ «ղալաթ է արել» նա, ով ասում է, թե լավ իշխանություն չի լինում․ «Կա հաղթող և պարտվող, խաղաղասեր և պատերազմատենչ իշխանություն։ Մենք ունենք պատերազմից փող աշխատող իշխանություն․ դա մայրերի արցունքից, երեխաների արյունից օգտվող իշխանությունն է»։

Մեր զրուցակիցը նկատում է՝ շատ հայաստանցիներ, հայտնվելով արտերկրում, աշխատելով առողջ համակարգում, դառնում են այդ համակարգի մի մասը և հաջողություններ են գրանցում․ «Իսկ մեր իշխող համակարգը որոշել է, որ առանց ընտրությունների էլ կլինի, տգեղ, տխմար համակարգ է։ Ինչո՞ւ Հայաստանը Ռուսաստանից այսքան մեծ կախում ունի, ինչի՞ց է, որ կողքի պետությունները մեզ հետ ոնց ուզում, այնպես էլ վարվում են, ինչու՞ է աշխարհը մեր մասին բանակցում՝ առանց մեզ, որովհետեւ գիտեն, որ մեր իշխանությունները կամազուրկ են»։

Արմեն Մարտիրոսյանը խոսում է նաև երկրի կառավարման, հանրային գիտակցության ձևավորման գործում մտավորականի դերից․ «Ցավոք, Լևոն Խեչոյանից հետո իշխանությունն էլ չի մրսում, չկա որևէ մտավորական, որից իշխանությունը կմրսի, կկաշկանդվի։ Իհարկե, կան մտավորականներ, որոնք երբեք չեն կռացել․ նրանք մեր աղն են, որի շուրջ կեղտ, վիրուս ու բակտերիա չի հավաքվում»։

Մանրամասները՝ տեսանյութում։

Աննա Բաբաջանյան