08.10.2026 | 22:50
Հայաստանի համար էներգետիկ դիվերսիֆիկացիան ռազմավարական առաջնահերթություն է. Սարգիս Խանդանյան
Ոչ մի թուրք խաղաղապահ չի ուղարկվի Լեռնային Ղարաբաղ․ Լավրով. ՏԵՍԱՆՅՈՒԹ
Քաղաքականություն
12.11.2020 | 13:52
Ոչ մի թուրք խաղաղապահ չի ուղարկվի Լեռնային Ղարաբաղ։ Այս մասին հայտարարել է ՌԴ ԱԳ նախարար Սերգեյ Լավրովը։ Նա հավելել է, որ թուրք դիտորդների տեղաշարժի սահմանները կսահմանափակվեն Ադրբեջանում դիտորդական կենտրոնի գտնվելու վայրով:
«Թուրքիայի Հանրապետության ոչ մի խաղաղապահ ստորաբաժանում չի ուղարկվի։ Այս մասին հստակ ասվում է ղեկավարների հայտարարությունում»,- ասել է ՌԴ ԱԳ նախարարը։
Լավրովի խոսքով՝ Թուրքիայից դիտորդների տեղաշարժման սահմանները կսահմանափակվեն Ադրբեջանում տեղակայված ռուս-թուրքական կենտրոնի տեղակայման վայրով։ Նա նաև հայտարարել է, որ Մոսկվան հավատացած է՝ բոլոր կողմերը շահագրգռված են Լեռնային Ղարաբաղում ռուս խաղապահների տեղակայմամբ։ Լավրովը նշել է, որ Ռուսաստանը չի դիտարկում Լեռնային Ղարաբաղի շուրջ ձեռք բերված պայմանավորվածությունների ձախողման փորձեր։
«Ես դեռևս չեմ տեսնում նշաններ, որ ինչ-որ մեկը փորձում է խափանել այդ պայմանավորվածությունները»,- հավելել է ՌԴ ԱԳՆ ղեկավարը։
Հիշեցնենք՝ ավելի վաղ Ադրբեջանի նախագահի մամուլի ծառայությունից հայտնել էին, որ Իլհամ Ալիևն ու Թուրքիայի նախագահ Ռեջեփ Թայիփ Էրդողանը քննարկել են Լեռնային Ղարաբաղի շուրջ տիրող իրավիճակն ու տարածաշրջանում «ռուս-թուրքական խաղաղարար կենտրոնի» ստեղծումը։ Նույն օրը Դմիտրի Պեսկովը լրագրողներին հայտարարել է, որ Ադրբեջանի տարածքում Լեռնային Ղարաբաղում մոնիթորինգի կենտրոնի ստեղծման մասին գրված չէ կրակի դադարեցման և դրա պայմանների մասին Ադրբեջանի, Հայաստանի և Ռուսաստանի նախագահների համատեղ հայտարարությունում, այլ «առանձին պայմանավորվածության առարկա է»։
ՌԴ նախագահի խոսնակը նաև հավելել է, որ Լեռնային Ղարաբաղում թուրք խաղաղարարների ներկայություն նախատեսված չէ։ Երեկ Թուրքիայի նախագահ Ռեջեփ Թայիփ Էրդողանը հայտարարեց, որ Անկարան ու Մոսկվան արձանագրություն են ստորագրել ռուս-թուրքական համատեղ կենտրոնի ստեղծման վերաբերյալ, որը պետք է հետևի Լեռնային Ղարաբաղում հրադադարի ռեժիմի պահպանմանը։ Այսօր արդեն հայտնի դարձավ, որ Ռուսաստանի պատվիրակությունը Թուրքիա է մեկնելու ուրբաթ՝ նոյեմբերի 13-ին, քննարկելու Ղարաբաղի հարցով համատեղ դիտորդական կենտրոնի վերաբերյալ համաձայնագրի մանրամասները:
Մանրամասները՝ տեսանյութում։
Տաթև Ֆռանգյան
