Չկա «օդ փակել» հասկացություն, մարդիկ սխալմամբ մտածում են, որ դա հնարավոր է, որը չի արվում. Արծրուն Հովհաննիսյան. ՏԵՍԱՆՅՈՒԹ

Factor.am-ի հարցազրույցը Պաշտպանության նախարարության ներկայացուցիչ Արծրուն Հովհաննիսյանի հետ:

-ԱԹՍ-ների դեմ միասնական այքարի արդյունավետ միջոց, ձեր կարծիքով, գոյություն չունի, և որևէ բանակ ի զորու չէ այդ խնդիրը վերջնականապես լուծել: Փորձագիտական շրջանակում կարծիք է հնչում՝ փակեք օդը, և այդ խնդիրը կլուծվի: Ի՞նչ է նշանակում «օդ փակել», ինչո՞ւ չենք փակում, թե՞ փակել ենք:

-Անկեղծ ասած, փորձագիտական շրջանակում այդպիսի տերմինի չեմ հանդիպել, որովհետև «օդ փակելը» ոչ մասնագիտական տերմին է, օդը կողպեք չէ, որ բանալիով փակես: Ես միշտ օրինակ եմ բերում, որ աշխարհի ամենահզոր՝ 1 քառակուսի կիլոմետրի վրա ՀՕՊ-ի լավագույն միջոցներով հագեցած խտությունը Իսրայելում է, բայց տասնյակ ու հարյուրավոր օդային արձակման միջոցներից էլի մեկը, երկուսը, ինչ-որ մի տոկոս անցնում է: Չկա «օդ փակել» հասկացություն, դա սիրողական ընկալում է: Ցավում եմ, որ որոշ մարդիկ դա շատ են օգտագործում և մարդիկ սկսում են հավատալ, որ կա օդը փակելու միջոց, որը չի կիրառվում: ԱԹՍ-ների դեմ պայքարը գլխացավանք է ամբողջ աշխարհի համար… Պետք է ավելի անկեղծ լինել և ասել, որ մեզ պետք է բարելավել հակաօդային պաշտպանության մակարդակը: Այո, մենք պետք է ձգտենք այնպիսի հակաօդային պաշտպանության միջոցների, որ, օրինակ, եթե 10 ԱԹՍ-ից խոցում ենք 2-ը, 5-ը, խոցենք 7-ը, 8-ը. սա է ամբողջ հարցը:

-Օդ փակելու մեկ միասնական տարբերակ գոյություն չունի:

-Չկա այդպիսի բան: Նախ՝ զուտ խոցող միջոցը, առանձին վերցրած զենքը էֆեկտիվ չէ: ՀՕՊ ամեն մի առանձին միջոց ֆիքսված ժամանակում կարող է խոցել x քանակի ԱԹՍ կամ օդային հարձակման այլ միջոց: Օդային հարձակման միջոց ունեցողը դա հաշվարկում է և ինչ-որ կոնկրետ տեղամասում ստեղծում է 3x քանակի օդային հարձակման միջոց, կարող ես խոցել 1x, 2x-ը բաց է մնում, և այդ 2x-ը փորձելու են քո ՀՕՊ միջոցին շարքից հանել, որպեսզի հաջորդիվ ավելի ապահով աշխատեն: Սա հասարակ բանաձև է օդուժի և հակաօդային պաշտպանության պայքարի մեջ:

Ռոբերտ Անանյան