10.02.2026 | 11:46
Ալեն Սիմոնյանի ճեպազրույցը՝ ՈՒՂԻՂ
ԵՐԵՎԱՆԻ ԺԱՄԱՆԱԿՈՎ. Մենք մենակ ենք, բայց՝ վճռական, նահանջելու տեղ չունենք․ Կարինե Խոդիկյան․ ՏԵՍԱՆՅՈՒԹ
Քաղաքականություն
29.09.2020 | 22:30
«Այսօր ես վստահություն ունեմ մեր բանակի, մեր անկախության զավակի նկատմամբ, վստահություն կա, որ մեր բանակը սպառազինված է 21-րդ դարին հարիր տեխնիկայով։ Ես մինչև սեպտեմբերի 27-ն էի վստահ, որ իմ զինվորը հագնված է, կուշտ է, պետության կողմից ստանում է այն ամենը, ինչ իրեն պետք է։ Երբ այս ամենը միահյուսվում է, տալիս է այդ խենթության հասնող վստահությունը»,- Factor TV-ի հետ զրույցում նշում է դրամատուրգ, արձակագիր Կարինե Խոդիկյանը։
Նրա խոսքով՝ 3 միլիոն ժողովուրդն այսօր կռիվ է տալիս 90 միլիոնի դեմ․ հակառակ կողմում Ադրբեջանն է և Թուրքիան։
Դրամատուրգը հիշեցնում է՝ իզուր չէ, որ մեր ոխերիմ հարևանն ասում է՝ վախեցեք հայերի միասնությունից․ «Բոլորի մոտ մի միտք է՝ հերի՛ք եղավ։ Մենք նահանջելու տեղ չունենք։ Մենք այլևս աշխարհի մեծերի հազար ու մի խաղերին ծափահարելու ժամանակ չունենք։ Մեր համբերության բաժակը լցվել է»։
Տիկին Խոդիկյանը, անդրադառնալով հայաստանյան քաղաքական ուժերի միասնականությանը, նկատում է․ «Ընդամենը օրեր առաջ ներքաղաքական ուժերը մասնատված էին, բայց այսօր, համոզված եմ, կանգնած են իրար թիկունքի։ Պատմության մեջ սև տառերով կգրվի քաղաքական այն ուժի, հոսանքի անունը, որը կփորձի այս ընթացքում խաղեր տալ»։
Ինչ վերաբերում է հակառակորդին, դրամատուրգի համոզմամբ, այն նույնն է՝ հույսը դնում է վարձկանների, նավթադոլարների և գլխաքանակի վրա։ Արձակագիրը խոսում է նաև միջազգային հանրությունից մեր ակնկալիքների մասին։
«Ես վաղուց բուժվել եմ «թղթե շերեփի» կոմպլեքսից։ Հիմա աշխարհի մեծերը սուրճի երկու կումի արանքում թեթև հետաքրքրությամբ նայում են, թե ով կհաղթի գոտեմարտում։ Մենք ունենք մեզ բարին կամեցող երկրներ, բայց նրանց ո՛չ խոսքն ունի տեսակարար կշիռ, ո՛չ էլ ասելու կերպն է մթնոլորտ ստեղծում։ Պետք չէ, որ մենք վիրավորվածի կեցվածք ընդունենք։ Եկեք այս բարդույթից վերջնականապես ազատվենք։ Մենք մենակ ենք, բայց՝ վճռական»,- ասում է Կարինե Խոդիկյանը։
Հարցազրույցն ամբողջությամբ՝ տեսանյութում։
Աննա Բաբաջանյան
