Հայաստան հոսող տրանսֆերտները 7 ամսում կրճատվել են 15․3%-ով

Կորոնավիրուսն ու դրա հետևանքով սահմանափակումներն իրենց ազդեցությունն են թողել նաև Հայաստան մուտք գործող գումարների վրա։ Այս տարվա առաջին 7 ամիսներին Հայաստան ուղարկվող գումարները, նախորդ տարվա նույն ժամանակաշրջանի համեմատ, կրճատվել են 15․3 տոկոսով։ Այս մասին տեղեկանում ենք Կենտրոնական բանկի հրապարակած տվյալների վերլուծությունից։

Այսպես՝ 2020 թվականի հունվար-հուլիս ամիսներին Հայաստան է ուղարկվել 893 մլն 289 հազար դոլար, իսկ 2019 թվականի նույն ամիսներին՝ 1 մլն 55 հազար 256 դոլար։

Հայաստան ուղարկված գումարների առյուծի բաժինը գալիս է Ռուսաստանի Դաշնությունից։ Այս տարվա հունվար-հուլիսին ՌԴ-ից Հայաստան է ուղարկվել 399 հազար 310 դոլար՝ նախորդ տարվա նույն ժամանակահատվածի 556 հազար 136 դոլարի փոխարեն։ Այսինքն՝ ՌԴ-ից մուտքերը նվազել են 28․2%-ով։ Այստեղ մեծ դեր ունեն աշխատանքի նպատակով Ռուսաստան մեկնող ՀՀ քաղաքացիների կողմից ուղարկված գումարները, որոնք այս տարի նվազել են, քանի որ սահմանափակումների պատճառով նրանցից շատերն այս տարի չեն մեկնել ՌԴ։

Հատկանշական է, որ չնայած ընդհանուր ներհոսքի նվազմանը՝ ԱՄՆ-ից եկող գումարներն ավելացել են։ Այս տարվա առաջին 7 ամիսներին դրանք կազմել են 184 հազար 477 դոլար՝ նախորդ տարվա 150 հազար 067 դոլարի փոխարեն։ Աճը կազմել է 22%:

Հայաստանից արտերկիր փոխանցվող գումարները նույնպես նվազել են։ Այս տարվա առաջին 7 ամիսներին Հայաստանից գումարների արտահոսքը կազմել է 622 հազար 381 դոլար՝ նախորդ տարվա նույն ժամանակահատվածի 780 հազար 965 դոլարի փոխարեն։ Նվազումը կազմել է 25․4%:

Նախորդ տարվա նույն ամիսների համեմատ՝ Ռուսաստան փոխանցված գումարի նվազումը չնչին է եղել, իսկ ահա ԱՄՆ փոխանցվող գումարները նվազել են շուրջ 1․2 անգամ՝ կազմելով 73 հազար 683 դոլար՝ նախորդ տարվա նույն ժամանակահատվածի 163 հազար 188 դոլարի փոխարեն։

Անժելա Պողոսյան