Կքննարկենք հիմա լեռներում մագլցող մեր «սկալալազ» նախարարի բազմաթիվ հայտարարությունները. Նաիրա Զոհրաբյան. ՏԵՍԱՆՅՈՒԹ

ԱԺ-ում քննարկվում է նոր կորոնավիրուսի տարածումը կանխելու և այդ վիրուսի դեմ պայքարի ուղղությամբ ՀՀ Կառավարության և պարետատան իրականացրած միջոցառումների արդյունավետությունը, ինչպես նաև արտակարգ դրության ժամանակահատվածում մարդու իրավունքների և հիմնարար ազատությունների սահմանափակումների արդյունավետությունն ուսումնասիրելու նպատակով ստեղծվող հանձնաժողովի կազմի հարցը:

«Ես հասկացա, որ մեր իշխանական գործընկերները հավաստի փաստեր ունեն առ այն, որ ընդդիմության անպատասխանատու քայլերի արդյունքում կորոնավիրուսը մետաստազի նման տարածվել է»,- ասաց «Բարգավաճ Հայաստան» խմբակցության պատգամավոր Նաիրա Զոհրաբյանը՝ հավելելով, որ դա ևս մի փառահեղ առիթ է, որ ԱԺ քննիչ հանձնաժողով ստեղծվի:

«Այո՛, միասին կքննարկենք, ինչպես տիկին Նազարյանը նշեց, միտինգների ժամանակ վարակվածների և «Այո»-ի քարոզարշավի ժամանակ վարակվածների, կքննարկենք Հռոմի և Իտալիայի անպատասխանատու ռեյսերի, կորոնավիրուսը պինցետով և արաղով ախտահանելու հարցը, միասին կքննարկենք հիմա լեռներում մագլցող մեր «սկալալազ» նախարարի բազմաթիվ հայտարարությունները՝ դիմա՛կ դրեք, դիմակ մի՛ դրեք, վայ, հեսա եկել եմ, լրագրողներ, ձեզ կվարակեմ, հա-հա-հա: Կքննարկենք, թե այդ ինչպես եղավ, որ Գյումրիում մահացած տատիկի դիակը կորավ, հետո հայտնվեց Նոր Հաճնում ուրիշի գերեզմանոցում, հետո արտաշիրմում արեցին: Կքննարկենք մի քաղաքացու՝ օրերս արված հայտարարությունը, որ իր հարազատի դիակը տվել են՝ ամբողջ ատամնաշարը ջարդված: Կքննարկենք հարգարժան վարչապետի հայտարարությունը, որ որոշ դեպքերում մարդիկ մահացել են, որովհետև շտապօգնության մեքենան չի հասցրել հասցնել հիվանդանոց: Կքննարկենք, թե ինչի վրա է ծախսվել «Քովիդ» հիմնադրամի գումարները: Միգուցե հանձնաժողովում քննարկման արդյունքում պարզվի, որ համակարգը փայլուն աշխատել է, և մենք ձեզ հետ միասին Արսեն Թորոսյանին, պարետին և մյուս պատասխանատուներին կհանձնենք արիության մեդալ, իմ սուբյեկտիվ կարծիքով՝ քովիդի դեմ պայքարը տապալելու համար»,- հայտարարեց ԲՀԿ-ական պատգամավորը՝ հավելելով, որ սուբյեկտիվ դիրքորոշում ունի, ուստի այդ հանձնաժողովում չի լինի:

Մանրամասները՝ տեսանյութում: