20.02.2026 | 09:43
Երևանի շենքերից մեկի բակում ավտոմեքենաներ են այրվել
Հայտնի համաճարակաբանը կասկածում է, որ Ռուսաստանի պատվաստանյութը անվտանգ և արդյունավետ է
Քաղաքականություն
12.08.2020 | 10:37
ԱՄՆ առաջատար համաճարակաբան, դոկտոր Էնթոնի Ֆաուչին խիստ կասկածում է, որ Ռուսաստանում արտադրված նոր կորոնավիրուսի դեմ պատվաստանյութը «անվտանգ և արդյունավետ է»:
«Հուսով եմ, որ ռուսները իսկապես ապացուցել են, որ պատվաստանյութը անվտանգ և արդյունավետ է: Ես լրջորեն կասկածում եմ, որ նրանք դա արել են»,- ԱՄՆ-ի Ալերգիկ և վարակիչ հիվանդությունների ազգային ինստիտուտի տնօրենն ասել է ABC News-ի թղթակցին National Geographic-ի համար պատրաստվող նյութի շրջանակներում:
«Պատվաստանյութ ունենալը ու դրա անվտանգությունն ու արդյունավետությունն ապացուցելը երկու տարբեր բաներ են»,- ընդգծել է նա:
Ֆաուչին հավելել է, որ իրենք ունեն շուրջ 12 պատվաստանյութ:
«Եթե մենք ուզենայինք ռիսկի դիմել, վնասել շատ մարդկանց կամ նրանց տալ այնպիսի բան, որը չի գործում, մենք դա կարող էինք սկսել անել հենց հաջորդ շաբաթ: Բայց այդպես չի լինում»,- ասել է Ֆաուչին:
Հայտնի համաճարակաբանը ավելացրել է, որ երբ ամերիկացիները լսում են պատվաստանյութերի մասին նմանատիպ հայտարարություններ այնպիսի երկրներից, ինչպիսիք են Ռուսաստանը կամ Չինաստանը, նրանք պետք է հիշեն, որ Միացյալ Նահանգներում գործում են անվտանգության և արդյունավետության որոշակի չափանիշներ: Իսկ ռուսական պատվաստանյութի ստեղծողները դեռ չեն հրապարակել մարդկանց վրա արված փորձարկումներից որևէ տվյալ:
Հիշեցնենք, որ Ռուսաստանում երեկ գրանցվել է աշխարհում առաջին պատվաստանյութը նոր կորոնավիրուսի դեմ: Այդ մասին անձամբ հայտնել է նախագահ Պուտինը՝ հավելելով, որ իր դուստրերից մեկը արդեն պատվաստվել է կորոնավիրուսի դեմ և իրեն լավ է զգում:
Երեկ նաև հայտնի դարձավ, որ վարակվածների թիվը ամբողջ աշխարհում անցել է 20 միլիոնը:
