17.09.2026 | 17:33
Հովհաննես Համբարձումյանն ավարտեց կարիերան Հայաստանի հավաքականում
Հունիսին չճշտված հարուցիչով թոքաբորբի դեպքերը 6,5 անգամ աճել են․ ի՞նչն է պատճառը
11.08.2020 | 22:18
Հայաստանի Հանրապետությունում այս տարվա մարտ-հունիս ամիսներին կորոնավիրուսային հիվանդության (COVID-19) բացահայտման նպատակով իրականացված թեստերի քանակը 113 547 է, որոնցից հաստատված դեպքերի թիվը՝ 26 065։
Արդյոք այս թիվը ներկայացնո՞ւմ է հանրապետությունում կորոնավիրուսի տարածման ամբողջ պատկերը։
Հիշեցնենք, որ առողջապահության նախարար Արսեն Թորոսյանը իր ասուլիսներից մեկում հայտնել էր, որ հնարավոր է լինեն այնպիսի դեպքեր, որ բժիշկներն ասեն՝ իմաստ չունի թեստավորել, քանի որ մարդն ակնհայտորեն վարակված է կորոնավիրուսով: Ստացվում է, որ մարդկանց մի խումբ, վարակված լինելով կորոնավիրուսով, այնուամենայնիվ, չի ներառվում ամեն օր հրապարակվող կորոնավիրուսի հաստատված դեպքերի թվում։
Առողջապահության նախարարությունը նման վիճակագրություն չունի, թե քանի մարդ է վարակվել կորոնավիրուսով, բայց չի թեստավորվել։ Սակայն Պետական վիճակագրական ծառայության հրապարակած տվյալներից տեղեկանում ենք, որ Հայաստանի Հանրապետությունում այս տարվա հունիսին գրանցվել է չճշտված հարուցիչով թոքաբորբի 3895 դեպք։ Սա նախորդ տարվա նույն ամսվա համեմատ ավելի է 6,5 անգամ։
Նախորդ տարվա հունիսին գրանցվել է չճշտված հարուցիչով թոքաբորբի ընդամենը 514 դեպք։ Այս տարվա մայիս ամսին չճշտված հարուցիչով թոքաբորբերի թիվը նույնպես մի քանի անգամ պակաս է հունիսին գրանցված դեպքերից՝ գրանցվել է ընդամենը 814 դեպք։
Կարելի է ենթադրել, որ թվերի նման կտրուկ աճը պայմանավորված է հենց Covid-19-ով վարակված, թոքաբորբ ունեցող, սակայն չթեստավորված քաղաքացիների առկայությամբ։
Factor.am-ը սրա վերաբերյալ փորձեց պարզաբանում ստանալ Պետական վիճակագրական ծառայությունից և Առողջապահության նախարարությունից։ Հարցին Պետական վիճակագրական ծառայությունում դժվարացան պատասխանել՝ պատճառաբանելով, որ հարցը մասնագիտական է և պատասխան պետք է ստանանք Առողջապահության նախարարությունից։
Առողջապահության նախարարությունից, սակայն, ևս չհաջողվեց հստակ պատասխան ստանալ: «Չկա նման վերլուծություն, որ ասենք՝ այդ թվում կորոնավիրուս ունեցողներ կան, թե՝ ոչ։ Պետք է յուրաքանչյուր պացիենտի պատմությունը բացեն, նայեն»,- մեզ հետ զրույցում նշեց նախարարության հասարակայնության հետ կապերի բաժնի պետ Լիլիթ Բաբախանյանը։
Անժելա Պողոսյան
