Ադրբեջանում անցկացված զորավարժությունների հետևանքով զինվորները վարակվել են կորոնավիրուսով

Ադրբեջանական ընդդիմադիր լրատվամիջոցները տեղեկություններ են հրապարակում այն մասին, որ վերջերս անցկացված զորավարժությունների ժամանակ բազմաթիվ զինվորներ վարակվել են կորոնավիրուսով, որոշներն էլ՝ մահացել։

Freeazerbaijan.info կայքը փոխանցում է, որ իրենց խմբագրություն է դիմել մի քաղաքացի՝ ասելով, որ իր հարևանի որդին, որը ծառայել է Ադրբեջանի զինված ուժերի N097 տանկային բրիգադում և պետք է առաջիկայում ազատվեր ծառայությունից, կորոնավիրուսից մահացել է։

Քաղաքացին պատմել է, որ զինծառայողը մասնակցել է մայիսի 18-22-ն անցկացված զորավարժություններին,  որի ընթացքում էլ վարակվել է։ Զինծառայողի մարմինը հարազատներին են փոխանցվել փակ ալյումինե դագաղով, իսկ ամբողջ ընթացքը  վերահսկվել է զինկոմիսարիատի ներկայացուցիչների կողմից։

Նշենք, որ սոցիալական ցանցերի ադրբեջանական տիրույթում ու ընդդիմադիր մամուլում պարբերաբար տեղեկություններ են հրապարակում, որ Ադրբեջանի Զինված ուժերում վարակվածների թիվը մեծ է, իսկ իշխանություններն այս տեղեկությունը խնամքով թաքցնում են հանրությունից։

Տարբեր հրապարակումների համաձայն՝ կորոնավիրուսով հիվանդ զինվորներին տեղափոխում են Ահմեդբեյլիի զինվորական հիվանդանոց։ Հիվանդներից վերցնում են բջջային հեռախոսները՝ հնարավորություն չտալով կապ հաստատել հարազատների հետ, իսկ հոսպիտալի տարածքը վերահսկվում է ռազմական ոստիկանության կողմից։ Զինվորականների հարազատներն ամիսներով չեն կարողանում կապ հաստատել իրենց երեխաների հետ, տեղեկություն չունեն՝ նրանք ո՞ղջ են, թե՞ ոչ։

Նշենք, որ պաշտոնապես միայն մայիսին Ադրբեջանի իշխանությունները  հայտարարեցին, որ Զինված ուժերում կորոնավիրուսով վարակվածներ կան։ Մինչև օրս նրանք հերքում են վարակվածների մեծ թվի մասին լուրերը։

Հունիսի սկզբին, սակայն, ուշագրավ պաշտոնազրկում տեղի ունեցավ Ադրբեջանի պաշպանության նախարարությունում։ Իլհամ Ալիևի հրամանով Պաշտպանության նախարարության գլխավոր բժշկական վարչության պետ գեներալ-մայոր Նաթիկ Ալիևը ազատվեց զբաղեցրած պաշտոնից և տեղափոխվեց պահեստազոր: Տարբեր փորձագետներ այս պաշտոնանկությունը կապում են հենց երկրի Զինված ուժերում կորոնավիրուսի տարածման հետ։

Էմմա Չոբանյան