Սահմանադրության փոփոխությամբ սահմանված անցումային դրույթներն ունեն անմիջական ազդեցություն և դրանց գործողությունը պայմանավորված չէ այլ ակտերի ընդունմամբ. Ռուստամ Բադասյանը՝ ՍԴ դատավորներին

«Անդրադառնալով Սահմանադրության փոփոխությունների ուժի մեջ մտնելուց մի քանի ժամ առաջ ՀՀ ՍԴ չորս դատավորների` «Սահմանադրական դատարանի մասին» սահմանադրական օրենքի կարգավորումների վերաբերյալ հայտարարությանը՝ հարկ եմ համարում նշել, որ Սահմանադրության 5-րդ հոդվածի 1-ին մասի համաձայն` այն ունի բարձրագույն իրավաբանական ուժ: Սահմանադրության փոփոխությամբ սահմանված անցումային դրույթներն ունեն անմիջական ազդեցություն և դրանց գործողությունը պայմանավորված չէ այլ ակտերի ընդունմամբ: Օրենքների համապատասխանեցումները Սահմանադրությանը կկատարվեն սեղմ ժամկետներում, սակայն դրանով չի միջնորդավորվել Սահմանադրության փոփոխությունների գործողությունը, որը վաղը մտնելու է ուժի մեջ»,- ֆեյսբուքի իր էջում գրել է ՀՀ արդարադատության նախարար Ռուստամ Բադասյանը:

Հիշեցնենք, որ ՀՀ ՍԴ 4 դատավորներ՝ Հ. Թովմասյանը, Ա. Գյուլումյանը, Ֆ. Թոխյանը և Հ. Նազարյանը, հայտաարարություն էին տարածել՝ արդարադատության նախարարին հորդորելով դուրս չգալ լիազորությունների շրջանակից՝ հղումանելով Սահմանադրության 167-րդ հոդվածին, ըստ որի՝ Սահմանադրական դատարանի լիազորությունները սահմանվում են Սահմանադրությամբ, իսկ կազմավորման և գործունեության կարգը` Սահմանադրությամբ և Սահմանադրական դատարանի մասին օրենքով:

Նշենք, որ ՍԴ դատավորների հայտարարությունը հաջորդել էր նախարար Ռուստամ Բադասյանին ուղղված Factor.am-ի հարցին, թե եթե ՍԴ դատավորները չենթարկվեն ուժի մեջ մտնող փոփոխությանը, արդյոք նրանց նկատմամբ հարկադրանքի միջոցներ կկիրառվեն, ինչին նախարարը պատասխանել էր․ «Փոփոխության՝ վաղվանից ուժի մեջ մտնելուց հետո, ցանկացած անձ պարտավոր է դրան ենթարկվել, չեմ կարծում, թե հարկադրանքի կարիքը կա, չկա չենթարկվելու ձև»։