01.07.2026 | 11:30
Պաշտոնանկություններ և պաշտոնի նշանակում ՀՀ կառավարությունում
Առաջին հերթին տուժածները պետք է թեկնածու առաջարկեն․ Արթուր Սաքունցը՝ փաստահավաք հանձնաժողովի կազմի մասին․ ՏԵՍԱՆՅՈՒԹ
Հասարակություն
19.06.2020 | 18:38
ՀՔԱ Վանաձորի գրասենյակի ղեկավար, իրավապաշտպան Արթուր Սաքունցը փաստահավաք հանձնաժողովի անունն առաջարկում է դարձնել «Ճշմարտության հանձնաժողով», քանի որ դրա էությունը ճշմարտության բացահայտումն է, ոչ թե պարզապես փաստերի հավաքագրումը։ Այս մասին իրավապաշտպանը նշեց «Փաստահավաք հանձնաժողով․ արդարության և ճշմարտության վերականգնման հնարավորություն» թեմայով քննարկման ընթացքում։
«Հանրության համար դա պետք է լինի ճշմարտության հանձնաժողով՝ փաստերի հիման վրա։ Այստեղ փաստերը միջոց են»,- նշեց Սաքունցը։
Նա նաև առաջարկներ ունի հանձնաժողովի կազմի ձևավորման վերաբերյալ։ Ասաց՝ հանձնաժողովը պետք է վայելի հանրային վստահությունը։
«Մարդու իրավունքների կոպիտ խախտումներից տուժած խմբերը, առաջին հերթին՝ զոհերը, տուժածները, այն մարդիկ, որոնց իրավունքները կոպտորեն խախտվել են, նրանք առաջին հերթին պետք է իրավասություն ունենան ներկայացնելու, իրենց պատկերացմամբ, այն մարդկանց, որոնց վստահում են»,- նշեց Սաքունցը։
Նա ընդգծեց, որ թեկնածուների առաջարկներ ոչ մի դեպքում չպետք է ներկայացնեն քաղաքական խմբակցությունները, քանի որ հանրությունը կմեղադրի, որ քաղաքական նպատակահարմարությունից ելնելով են թեկնածու առաջադրում։
Հիշեցնենք, որ ՀՀ արդարադատության նախարարությունը մշակել և հանրային քննարկման է ներկայացրել «Հայաստանի Հանրապետության փաստահավաք հանձնաժողովի մասին» ՀՀ օրենքի և հարակից օրենքների նախագիծը։ Այս հանձնաժողովն օժտված է լինելու 1991-2018 թվականների ընթացքում Հայաստանի Հանրապետությունում տեղի ունեցած մարդու իրավունքների զանգվածային և պարբերական խախտումների դեպքերը և դրանց պատճառներն ուսումնասիրելու, դրանց վերաբերյալ տեղեկություններ հավաքագրելու և դրանց կրկնության բացառմանն ուղղված առաջարկություններով հանդես գալու իրավասությամբ:
Մանրամասները՝ տեսանյութում։
