«Այդ ամենը պետք չի լուրջ ընդունել»․ ԲՀԿ-ից չեն մեկնաբանում ՔՊ-ականների հրապարակած փաստաթուղթը

Ազգային ժողովի փոխնախագահ Ալեն Սիմոնյանը քիչ առաջ ֆեյսբուքյան իր էջում հրապարակել է մի փաստաթուղթ, որը կապված է 2017 թվականին տեղի ունեցած խորհրդարանական ընտրությունների հետ։ Ավելի ուշ՝ փաստաթուղթը սկսեց շրջանառվել նաև այլ ՔՊ-ականների կողմից։

Փաստաթղթում մանրամասն ներկայացված է, թե 2017-ին որքան գումար է ծախսել «Բարգավաճ Հայաստան» կուսակցությունը թիվ 8-րդ ընտրատարածքում և ինչ նպատակով։ Օրինակ՝ նշված է, որ յուրաքանչյուր քվեի համար քաղաքացիներին վճարվել է 10․000-ական դրամ։

Թեմայի շուրջ մեկնաբանություն ստանալու համար փորձեցինք կապ հաստատել ԲՀԿ-ական պատգամավորների հետ։ Միքայել Մելքումյանը մեր բազմաթիվ զանգերն անպատասխան թողեց։ ԲՀԿ-ական մեկ այլ պատգամավոր Վահե Էնֆիաջյանը նշեց, որ այս պահին չի կարող մեկնաբանություն տրամադրել։

ԲՀԿ-ից Գևորգ Պետրոսյանն էլ, անդրադառնալով Ալեն Սիմոնյանի հրապարակած փաստաթղթին, մեզ հետ զրույցում նշեց․ «Ալեն Սիմոնյանը ի՞նչ կապ ունի էդ ամենի հետ։ Ազգային ժողովի փոխնախագահն ի՞նչ իրավուք ունի նման հայտարարություն հնչեցնել։ Ալեն Սիմոնյանը, որ այդ հարթակին է այսօր, դա Ծառուկյանի շնորհքն է։ Նա քաղաքական ֆիգուր չի, որ մենք էլ իր հայտարարությունը մեկնաբանենք, այդ ամենը պետք չի լուրջ ընդունել»։

Մեր հստակեցնող հարցին՝ արդյոք պնդում է, որ Ալեն Սիմոնյանի հրապարակած փաստաթուղթն իրականությանը չի համապատասխանում է, ԲՀԿ-ական պատգամավորը պատասխանեց․ «Չկա նման բան։ Մարդը աշխատավարձ է ստացել, դա աշխատանքային օրենսգրքի շրջանակում է եղել։ Ինքը վստա՞հ ա, որ իր հայտնած տեղեկատվությունը չի որակվելու որպես զրպարտություն»։

Հավելենք, որ այս պահին ԱԱԾ աշխատակիցները ԲՀԿ ղեկավար Գագիկ Ծառուկյանի առանձնատանը խուզարկություն են իրականացնում։ ԲՀԿ-ական պատգամավոր Նաիրա Զոհրաբյանի փոխանցմամբ, ըստ իրենց տեղեկությունների, խուզարկության պատճառը 2017 թվականին խորհրդարանական ընտրությունների ժամանակ Մարտունիի ԲՀԿ-ական թեկնածուներից մեկի հետ եղած ենթադրյալ ֆինանսական խնդիրներն են։

Նելլի Մելքոնյան