Վանեցյանի հայցն ընդդեմ Նիկոլ Փաշինյանի ու նրա մամուլի քարտուղարի դատարանը վարույթ է ընդունել

ԱԱԾ նախկին տնօրեն Արթուր Վանեցյանի հայցն ընդդեմ վարչապետ Նիկոլ Փաշինյանի և վարչապետի մամուլի քարտուղար Մանե Գևորգյանի Երևան քաղաքի դատարանը վարույթ է ընդունել։

Factor.am-ը Դատական տեղեկատվական համակարգից տեղեկանում է, որ հայտնի է նաև հայցը քննող դատավորը՝ Լիլիթ Տիգրանի Սարգսյան։ Վանեցյանի շահերը դատարանում ներկայացնում է փաստաբան Արամազդ Կիվիրյանը։

Հայցադիմումը դատարանն ստացել է հունիսի 4-ին, դիմող կողմը 52․000 դրամ է վճարել որպես պետտուրք։ Վանեցյանը վարչապետին ու նրա մամուլի քարտուղարին ներկայացրել է «զրպարտություն հանդիսացող փաստացի տվյալները հրապարակայնորեն հերքելու, դրանք հեռացնելու, հերքման տեքստը հրապարակելուն պարտավորեցնելու, պատվին և արժանապատվությանը պատճառված վնասի փոխհատուցման» պահանջ։

Հիշեցնենք, որ ապրիլի 29-ին Մանե Գևորգյանը սոցցանցի իր էջում կատարել էր հետևյալ գրառումը․ «Վարչապետի աշխատակազմի տվյալներով Սերժ Սարգսյանի փեսա Միքայել Մինասյանը կեղծ փայատերերի միջոցով ապօրինի փայաբաժիններ է ունեցել նաև «Սպայկա» ընկերությունում, «Երևան մոլում», «Շանթ» և «Արմենիա» հեռուստաընկերություններում, Զանգեզուրի պղնձամոլիբդենային կոմբինատում, մի շարք այլ ընկերություններում։ Այդ փայաբաժինների մեծ մասը 2018 թվականի ժողովրդական հեղափոխությունից հետո հապճեպ վաճառվել է։ ԶՊՄԿ-ում Մ. Մինասյանի փայաբաժինն, օրինակ, առերևույթ պաշտոնական լիազորությունների չարաշահմամբ և կրկին կեղծ փայատերերի օգնությամբ ձեռք է բերել ԱԱԾ նախկին տնօրեն Արթուր Վանեցյանը։ Վերջինիս հորը պատկանող ընկերությունը դարձել է նաև ԶՊՄԿ-ի բեռների խոշոր փոխադրող։ Տպավորություն է, որ սրա արդյունքում է, որ Միքայել Մինասյանի կոռուպցիոն համակարգի առանցքային անձինք՝ լինելով պոտենցիալ մեղադրյալներ, լքել են Հայաստանը, ինչն էլ դարձել է Մինասյանի կոռուպցիոն արարքների հետաքննության էական խոչընդոտ։ ՀՀ վարչապետը ակնկալում է, որ ՀՀ իրավապահ մամիններն ի հեճուկս բոլոր դժվարությունների՝ պատշաճ քննության կենթարկեն վերը նշվածը և Հայաստանի ժողովրդին կտան վստահելի պատասխաններ»։

Վանեցյանը հերքել է գրառման մեջ բերված տեղեկությունները և դիմել դատարան։