15.05.2026 | 23:20
Հուլիսի 1-ից Երևան-Բուխարեստ նոր ուղիղ չվերթ կմեկնարկի
Մարտից թիվ 1 համալսարանական հիվանդանոցի հատուկ covid-բաժանմունքը դատարկ է եղել և անհայտ պատճառներով չի գործածվել. Վահան Արծրունի
Քաղաքականություն
07.06.2020 | 20:12
Մարտից ԵՊԲՀ թիվ 1 կլինիկական հիվանդանոցի հատուկ covid-բաժանմունքը դատարկ է եղել և անհայտ պատճառներով չի գործածվել։ Այս մասին ֆեյսբուքում գրել է երգահան, հասարակական գործիչ, ԵՊԲՀ հոգաբարձուների խորհրդի նախագահ Վահան Արծրունին։
«Մարտ ամսից ԵՊԲՀ 1-ին կլինիկական հիվանդանոցում այս հատուկ covid-բաժանմունքը ամբողջովին կոմպլեկտավորված մասնագետներով, սարքավորումներով և բժշկական միջոցներով ԴԱՏԱՐԿ Է եղել և չի գործածվել անհայտ պատճառներով։
Մարտ ամսից համալսարանական կլինիկան կարող էր ընդունել և բուժօգնություն ցուցաբերել վարակակիրներին, բայց «չէր նկատվում» առղջապահության նախարարության կողմից, նույնիսկ այն պարագայում, երբ անկողնային և մասնագիտական ռեսուրսը սպառման առաջ էր կանգնած։
Այդ ատյանի ղեկավարը նախընտրում էր ոչ միայն հիվանդների «սորտավորումը», այլ նաև բուժհաստատությունների։ Ո՞վ է սրա պատասխանը տալու»:
Գրառման մեկնաբանություններում Երևանի պետական բժշկական համալսարանի աշխատակազմի ղեկավար Շուշան Դանիելյանը գրել է, թե Առողջապահության նախարարության հետ համաձայնեցրել են թիվ 1 համալսարանական հիվանդանոցի մի հատված տրամադրել covid հիվանդներին։
«Մեկուսարանը հագեցված է տեխնիկական բոլոր հզորություններով, և համալսարանական բժշկական հաստատությունները ևս։ Ի դեպ, նշեմ, որ այսօր փոխնախարարի հետ քննարկվել է եկող շաբաթվանից թիվ 1 համալսարանական հիվանդանոցի մի հատված տրամադրել covid հիվանդներին, իսկ Միքայելյան համալսարանական հիվանդանոցի՝ մի մեծ մասնաշենք»,- գրել է Շուշան Դանիելյանը։
Գրառման հետ կապված փորձեցինք մեկնաբանություն ստանալ նաև Առողջապահության նախարարությունից, սակայն օրը ոչ աշխատանքային է, և մեր զանգերին դեռ արձագանք չենք ստացել։ Պաշտոնական պարզաբանումը կհրապարակենք՝ այն ստանալուն պես։
Լիլիթ Շաբոյան
