Հայաստանում կորոնավիրուսով հիվանդներին արդեն սորտավորու՞մ են․ ԱՆ-ից մեկնաբանում են

Հ առողջապահության նախարար Արսեն Թորոսյանն օրերս ֆեյսբուքյան իր էջում տեղադրել էր հոդված բժշկական սորտավորման (տեսակավորման) մասին, ինչը հիվանդների բուժման գերակայության որոշման գործընթացն է՝ ելնելով նրանց վիճակի ծանրությունից։ Նման մեթոդ կիրառվում է այն ժամանակ, երբ առողջապահական համակարգի միջոցներն անբավարար են բոլորին անհապաղ բուժելու համար։

Ի՞նչ ենթատեքստ ուներ նախարարի այս գրառումը, արդյո՞ք Հայաստանի առողջապահական համակարգն արդեն գերբեռնված է և բուժում ստանալու համար հիվանդներին տեսակավորում են։

Առողջապահության նախարարության մամուլի խոսնակ Ալինա Նիկողոսյանն այս հարցի առնչությամբ Factor.am-ին ասաց, որ Հայաստանում առայժմ հիվանդների բժշկական սորտավորում չի կատարվում։

Հիշեցնենք՝ նախարար Արսեն Թորոսյանը մայիսի 22-ին կայացած Հանրային խորհրդի նիստի ընթացքում, այս թեմային անդրադառնալով, հայտարարել էր, որ չի բացառվում, որ վարակի տարածման՝ նման տեմպի պահպանման արդյունքում Հայաստանում կորոնավիրուսով հիվանդների խորը սորտավորման գնան։ Նախարարը նշել էր, որ հիմա անում են ամեն ինչ՝ դա չանելու համար, մասնավորապես՝ ավելացնում են մահճակալների թիվը։

Հավելենք, որ այսօր Հայաստանում հաստատվել է կորոնավիրուսի 452 նոր դեպք՝ գրանցված ընդհանուր դեպքերի թիվը հասցնելով 7․713-ի։ Մեկ օրում Հայաստանում արձանագրվել է 6 մահ։ Կորոնավիրուսից մահերի ընդհանուր թիվը, վերջին տվյալներով, 87 է, որից 39-ը՝ այլ պատճառով։

Նելլի Մելքոնյան