Հայաստանում 24 ժամում հայտնաբերվել է կորոնավիրուսով վարակման 351 նոր դեպք։ Արդյունքում՝ հաստատված դեպքերի ընդհանուր թիվը հասել է 4823-ի։
Ըստ worldometers․info վիճակագրական կայքի՝ Հայաստանում 1 միլիոն բնակչության հաշվով վարակվել է 1628 մարդ։ Հարևան Վրաստանում մեկ օրում հայտնաբերված նոր դեպքերը 6-ն են, իսկ հաստատված դեպքերի ընդհանուր թիվը՝ 701։ Վրաստանում 1 միլիոն բնակչության հաշվով վարակվել է 176 մարդ․ 1452-ով պակաս, քան Հայաստանում։
Եվ սա այն դեպքում, երբ Վրաստանի բնակչությունն ավելի քան մեկ միլիոնով գերազանցում է Հայաստանի բնակչությանը։
Ադրբեջանում, որի բնակչությունը Հայաստանից 3 անգամ շատ է, 1 միլիոն բնակչության հաշվով գրանցվել է վարակման 323 դեպք։
Ռուսաստանում, որտեղ տարածաշրջանում կորոնավիրուսի ամենաշատ դեպքերն են հայտնաբերվել, 1 միլիոն բնակչության հաշվով 1992 մարդ է վարակվել։
Այս ցուցանիշով Հայաստանը բավականին մոտ է Ռուսաստանին՝ այն դեպքում, երբ Ռուսաստանի բնակչությունը Հայաստանի բնակչությունից 48 անգամ մեծ է (շուրջ 146 միլիոն)։ Կորոնավիրուսի 149 հազար հաստատված դեպք ունեցող Թուրքիայում 1 միլիոն բնակչության հաշվով 1774 մարդ է վարակվել, այսինքն՝ Հայաստանից ընդամենը 146-ով ավել։ Սա այն դեպքում, երբ Թուրքիայի բնակչությունը Հայաստանի բնակչությանը գերազանցում է մոտ 28 անգամ (84 միլիոն)։ Վարակման 120 հազարից ավելի դեպք և շուրջ 84 միլիոն բնակչություն ունեցող Իրանում էլ 1 միլիոն բնակչության հաշվով վարակման դեպքերը 195-ով քիչ են, քան Հայաստանում։
Հավելենք, որ աշխարհում կորոնավիրուսով վարակման դեպքերը մոտ են 5 միլիոնին։ Վերջին տվյալներով՝ հաստատված դեպքերի ընդհանուր թիվը 4․8 միլիոն է։ Մահացությունների թիվը մոտ է 317 հազարին։
Նելլի Մելքոնյան
