11.01.2025 | 11:33
Արտարժույթների փոխարժեքները՝ հունվարի 11-ի դրությամբ
«Միասին Մենք Կարող ենք». բարեգործական համերգ, որի հասույթը կուղղվի ՀՀ առողջապահության ոլորտին
Հասարակություն
29.04.2020 | 21:15
«Միասին Մենք Կարող ենք» խորագրով բարեգործական համերգ, որը մեկ նախաձեռնության շրջանակում համախմբել է ավելի քան 4 տասնյակ արտիստների և բազմաթիվ անհատ բարերարների ու կազմակերպությունների: Առցանց համերգային ծրագրին հնարավոր կլինի հետևել մայիսի 2-ին, Երևանի ժամանակով 20:20-ին:
Իսկ նախաձեռնությունը «Թովմասյան» բարեգործական հիմնադրամինն է և ներառում է երեք ուղղություն՝ համերգ, աճուրդ և ֆլեշմոբ: Ստացված միջոցներն էլ ուղղվելու են Հայաստանում կորոնավիրուսի դեմ պայքարի առողջապահական ծրագրերին:
Հիմնադրամի ղեկավար Արտակ Թովմասյանը Factor.am-ի հետ զրույցում ասաց՝ համերգից ստացված ամբողջ հասույթն ուղղվելու է շնչառական սարքեր և դեղորայք ձեռք բերելուն:
«Վիրուսի հետևանքով մահերի քանակը սարսափեցնող է ամբողջ աշխարհում: Նույնիսկ զարգացած երկրները, ինչպիսիք են Իտալիան, Իսպանիան, ԱՄՆ-ը, չկարողացան կանխել հազարավոր մահեր հենց սարքավորումների սակավաթիվ լինելու պատճառով: Մեր երկրում նույնպես շնչառական ապարատները քիչ են, իսկ հիվանդների քանակն օրեցօր միայն աճում է: Հույս ունենք, որ հավաքագրված գումարով կկարողանանք որոշ քանակության նոր ապարատներ ձեռք բերել՝ աջակցելով ՀՀ առողջապահական համակարգին և փրկելով մարդկային կյանքեր»,- նշեց Թովմասյանը:
Բարեգործական համերգին մասնակցելու են հայ արտիստներ Երևանից, Լոս Անջելեսից, Մոսկվայից, Բեյրութից և Բրյուսելից:
«Այն արտիստները, որոնք գտնվում են Հայաստանում, ելույթ կունենան «Dvin Music Hall»-ում՝ պահպանելով սոցիալական հեռավորությունը, իսկ մյուս քաղաքներից մեզ միացած արտիստները ելույթ կունենան առցանց՝ տանից: Համերգի ընթացքում տեղի կունենա նաև բարեգործական աճուրդ, որին միացել են բազմաթիվ հանրաճանաչ և մեր կողմից սիրված անձինք՝ նվիրաբերելով տարբեր իրեր՝ «Միասին Մենք Կարող ենք» մակագրությամբ»,- մանրամասնեց Արտակ Թովմասյանը:
Ֆլեշմոբի ընթացքում էլ մասնակիցները կկիսվեն տեսանյութերով՝ ասելով «Միասին Մենք Կարող ենք», ինչպես նաև լուսանկարներով: Այս նյութերը հետագայում կօգտագործվեն մեկ տեսահոլովակում:
Համերգին հանդիսատեսը կհետևի տանից՝ վիրտուալ տեխնոլոգիաների միջոցով, ինչը հնարավորություն կտա իրապես զգալ համերգասրահում. վճարելով 5 դոլար՝ սմարթֆոնի միջոցով յուրաքանչյուրը կկարողանա միանալ և հետևել համերգին:
Արտակ Թովմասյանը հավելեց նաև, որ նախապես ծրագրում էին 25 արտիստի մասնակցություն, սակայն նրանց թիվը գրեթե կրկնապատկվել է: Իսկ բարեգործական աճուրդին են միացել այնպիսի աշխարհահռչակ դեմքեր, ինչպիսիք են Հենրիխ Մխիթարյանը, Դիդյե Դրոգբան, Պոլ Պոգբան և այլք, իսկ նկարիչ Շմավոն Շմավոնյանը կտավներ է նվիրաբերել:
