Հասարակություն
28.04.2020 | 22:45
Factor.am-ի տեղեկություններով՝ Ֆինանսների նախկին սուպերնախարար, 22,4 միլիոն դոլարի կաշառք ստանալու մեջ կասկածվող Գագիկ Խաչատրյանի որդիներից Արտյոմ Խաչատրյանն այս օրերին Հայաստանում չի գտնվում:
Հիշեցնենք, որ նախկին բարձրաստիճան պաշտոնյան նախորդ տարվա oգոստոսից կալանավորված է, նրա որդիների բիզնեսների վրա կալանք է դրված:
Factor.am-ը Խաչատրյանների պաշտպան Երեմ Սարգսյանից հետաքրքրվեց՝ արդյոք ճիշտ են տեղեկությունները, որ Արտյոմ Խաչատրյանը երկրից այս փուլում հեռացել է: «Արտյոմ Խաչատրյանը երկրից չի հեռացել: Նա մշտապես բիզնես գործունեությամբ պայմանավորված՝ գնում և գալիս է Հայաստան: Իսկ ներկայումս կորնավիրուսով պայմանավորված՝ չի կարողանում ետ վերադառնալ»,- ասաց նա:
Հիշեցնենք, որ ԱԱԾ-ն այսօր հայտարարել էր Հայաստանի պատմության մեջ աննախադեպ չափերի կաշառք տալու գործի մասին, որը վերաբերում է ՊԵԿ նախկին նախագահ Գագիկ Խաչատրյանին։ Ըստ ԱԱԾ-ի՝ ՀՀ խոշոր հարկատուների ցանկում ընդգրկված կոնցեռնի գլխավոր տնօրենը, ՀՀ ՊԵԿ նախագահի, այնուհետև՝ ՀՀ ֆինանսների նախարարի պաշտոնը զբաղեցրած պաշտոնատար անձին՝ վերջինիս որդիների միջոցով, տվել է առանձնապես խոշոր չափերով` 22.401.000 ԱՄՆ դոլարի կաշառք, նշված բարձրաստիճան պաշտոնատար անձի կողմից ծառայության գծով ընդհանուր հովանավորչության, վերջինիս ղեկավարման ներքո գտնվող հարկային և մաքսային մարմինների կողմից իր ներկայացրած առևտրային կազմակերպությունների գործունեության համար խոչընդոտներ չստեղծելու նպատակով։
ԱԱԾ-ի այս հայտարարությունից քիչ անց հայտարարություն տարածեց Գագիկ Խաչատրյանի որդին՝ «Գալաքսի» ընկրությունների խմբի համահիմնադիր Գուրգեն Խաչատրյանը: Նա, մասնավորապես, տեղեկացրեց, որ բարձրաստիճան պաշտոնյաների կողմից եղել են ճնշումներ, որպեսզի իրենք «Յուքոմ» ընկերությունից հրաժարվեն:
Այս հայտարարությանն ի պատասխան վարչապետի խոսնակ Մանե Գեւորգյանը տեղեկացրեց, որ Խաչատրյանները հայաստանյան մի շարք պաշտոնյաների մոտ հայատարարել են, թե պատրաստ են հետ վերադարձնել պետությունից «թալանած փողերը»:
Նարեկ Կիրակոսյան
