01.02.2026 | 10:26
Բախվել են ավտոմեքենաներ․ կան տուժածներ
Վարչապետի աշխատակազմը պատշաճ պարզաբանումներ է ակնկալում Հ1-ից` տեխնիկական փորձի կադրերի արտահոսքի վերաբերյալ. խոսնակ
19.04.2020 | 10:01
ՀՀ վարչապետի խոսնակ Մանե Գևորգյանը ֆեյսբուքի իր էջում գրառում է կատարել՝ անդրադառնալով Հանրային հեռուստաընկերությամբ վարչապետի ուղերձի նախապատրաստական աշխատանքները բաց կապուղիով մյուս հեռուստաընկերություններին տրամադրելու դեպքին:
«Հարգելի գործընկերներ,
Հանրային հեռուստաընկերության կողմից վարչապետի աշխատակազմի հորդորով վարչապետի ուղերձը բաց կապուղիով մյուս հեռուստաընկերություններին տրամադրելն ամենևին էլ չի նշանակում, որ հեռուստաընկերությունը պետք է բաց կապուղի ապահովեր` սկսած նախապատրաստական աշխատանքներից:
Պրոֆեսիոնալ մոտեցումը ենթադրում է, որ մյուս հեռուստաընկերություններին բաց կապուղի պետք է հաղորդվեր եթերից բացառապես վայրկյաններ, այլ ոչ 5,10,15 կամ 20 րոպե առաջ։
Այնինչ պարզվել է, որ Հանրային հեռուստաընկերությունը, առանց վարչապետի աշխատակազմին տեղյակ պահելու, առնվազն 15 րոպե առաջ բաց կապուղի է ապահովել մյուս հեռուստաընկերությունների համար։
Վարչապետի լրատվական ծառայությունը բաց կապուղու մասին տեղյակ է եղել ուղերձից 20 վայրկյան առաջ, տվել է ուղիղ եթերի համար անհրաժեշտ հետհաշվարկը, որից հետո մեկնարկել է ուղերձը։ Ավելին՝ կառավարության լրատվական ծառայությանը տեղեկացվել է, որ նախքան վարչապետի ուղերձի մեկնարկը, եթերում լինելու է միայն լուսանկար, այդ թվում՝ բաց կապուղում։
Տեղի ունեցածը վկայում է, որ փորձնական հեռարձակումը այլ հեռուստաընկերություններին հասանելի դարձնելը ոչ պրոֆեսիոնալիզմի արդյունք է, քանզի ոլորտի սկսնակ մասնագետներն էլ տեղյակ են, որ հեռարձակումը փորձարկում են նախապես, մինչեւ վարչապետին տեսախցիկի առաջ հրավիրելը։
Խիստ թափթփված աշխատելաոճի վկայություն է նաեւ վարչապետին տեղյակ չպահելը, որ նա եթերում է՝ թեկուզ փորձնական։ Միայն գործից անտեղյակը կարող էր ենթադրել, որ բաց կապուղի այլ հեռուստաընկերությունների համար անհրաժեշտ է ապահովել ուղերձից 15 րոպե առաջ։
Վարչապետի աշխատակազմը պատշաճ պարզաբանումներ է ակնկալում հեռուստաընկերությունից` տեխնիկական փորձի կադրերի արտահոսքի վերաբերյալ»,- գրել է խոսնակը:
Հիշեցնենք, որ Նիկոլ Փաշինյանը ապրիլի 17-ին ուղիղ եթերում կորոնավիրուսի սոցիալ-տնտեսական հետևանքների և առաջիկա անելիքների հետ կապված ուղերձ էր հղել ժողովրդին։ Երեկ համացանցում հայտնվել էր մի տեսանյութ, որում առկա են կադրեր ուղերձի նախապատրաստական փուլից՝ մինչև ուղիղ եթեր մտնելը։ Մոնտաժված է այնպես, որ Նիկոլ Փաշինյանին փորձել են ներկայացնել ծաղրական կերպարում։
Factor.am-ը անդրադարձել էր միջադեպին՝ մեկնաբանություն վերցնելով Առաջին ալիքի գործադիր տնօրեն Մարգարիտա Գրիգորյանից, որը պատասխանել էր՝ չեն պարզել, թե արտահոսքն ինչպես է տեղի ունեցել, երբ պարզեն հրապարակավ կտեղեկացնեն:
Ապա ժամեր անց Հանրային հեռուստաընկերությունը պարզաբանում էր տարածել, թե վարչապետի ուղիղ եթերի բաց կապուղին տրվել է 8 հեռուստաընկերության:
