Սամվել Բաբայանը հայտնեց, թե ում օգտին է քվեարկել. ՏԵՍԱՆՅՈՒԹ

Արցախի նախագահական ընտրություններում քաղաքացիական պարտքը կատարեց նաև «Միասնական հայրենիք» կուսակցության առաջնորդ Սամվել Բաբայանը։

Քվեարկելուց հետո նա պատասխանեց լրագրողների հարցերին։ Ո՞ւմ է ընտրել Սամվել Բաբայանը, այն դեպքում, երբ նախկինում իր աջակցությունն ունեցած թեկնածու Մասիս Մայիլյանը բոյկոտի կոչ է արել․ «Ընտրությունն արել ենք երկրի զարգացման համար»։

Իսկ ո՞վ կարող է այդ զարգացումն ապահովել․ «Էն թիմը, որը եկել ա, պառլամենտական թիմը»։

Լրագրողի հստակեցնող հարցին՝ «Ազատ հայրենիք» կուսակցության թեկնածուի օգտի՞ն է քվեարկել, Բաբայանը պատասխանեց․ «Հինգ կուսակցության 17 մանդատ կա այս պահին, բացի «Ազատ հայրենիքից», որն ունի 16 մանդատ, ո՞վ է մեծամասնությունը»։

Բոլորի հետ, այդ թվում՝ Արայիկ Հարությունյանի հետ համագործակցության եզրեր տեսնում է՝ ծրագրերի համադրման դեպքում․ «Անընդհատ պաշտոնի կռիվ եք տալիս, ով պաշտոնի կռիվ է տալիս, պետք է շպրտել դուրս։ Մենք տարել ենք գաղափարական պայքար, պաշտոնի կռիվ չենք արել»։

Ի վերջո ո՞ւմ է ձայն տվել Սամվել Բաբայանը: «Մասիս Մայիլյանի օգտին, տենց ձե՞ռ ա տալիս ձեզ»,- պատասխանեց Սամվել Բաբայանը։

Մասիս Մայիլյանի հետ հարաբերություններից խոսելիս, ասաց, որ կոնֆլիկտ չկա նրա հետ: «Եթե Մասիս Մայիլյանն ընդհանրապես հրաժարվել է․․․ մեր ընտրազանգվածն ինքնուրույն է որոշում ում ընտրել։ Մասիս Մայիլյանի հետ հոյակապ անձնական հարաբերություն ունեմ»,- ասաց Սամվել Բաբայանը։

Մանրամասները՝ տեսանյութում:

Ռոբերտ Անանյան