Արցախում կորոնավիրուսով վարակված անձի հետ միայն մի բուժաշխատող է շփվել. տեղեկատվական շտաբ

Factor.am-ն այսօր դիմել էր Արցախի պետնախարար Գրիգորի Մարտիրոսյանին՝ պարզելու՝ ի՞նչ իրավիճակ է կորոնավիրուսի առաջին հաստատված դեպքից հետո, արդյոք նախագահի ընտրության 2-րդ փուլը հետաձգելու հարց քննարկվում է և այլ հարցեր։ Մեզ պատասխանեցին Արցախի տեղեկատվական շտաբից։

-Երեկ Արցախում կորոնավիրուսի առաջին դեպքը հաստատվեց։ Ընտրության 2-րդ փուլը հետաձգելու կարիք չե՞ք տեսնում։

ԱՏՇ-Արցախի Հանրապետությունում ձևավորված նոր կորոնավիրուսի տարածման կանխարգելման աշխատանքները համակարգող միջգերատեսչական հանձնաժողովն իր իրավասության շրջանակներում վերլուծում է քաղաքացիների առողջությանը վերաբերող բոլոր ռիսկերը, դրանց առավելագույնս նվազեցմանն ուղղված գործողությունների ծրագիր և համալիր միջոցառումներ է իրականացնում՝ վարակի հնարավոր տարածումը կանխելու ուղղությամբ: Այդ տրամաբանության մեջ էլ Կենտրոնական ընտրական հանձնաժողովն է իր աշխատանքները կազմակերպում: Այն, ինչ արվել է առաջին փուլում՝ ընտրատեղամասերի ախտահանում, քվեարկության մասնակիցներին, հանձնաժողովի անդամներին ու առհասարակ ընտրատեղամասում գտնվողներին պաշտպանիչ դիմակներով, ձեռնոցներով, անհատական գրիչներով, անհրաժեշտ ախտահանող նյութերով ապահովում, նախատեսված է ապահովել նաև ընտրությունների երկրորդ փուլում: Քննարկվում է նաև լրացուցիչ միջոցառումների իրականացման հարցը, ինչն ամբողջացնելուց հետո կհրապարակվի:

-Ընտրության 2-րդ փուլը հետաձգելու հարց այժմ քննարկվո՞ւմ է, թե՝ ոչ։

ԱՏՇ-Եթե նման որոշում լինի՝ հանրությանը պատշաճ ձևով կտեղեկացվի:

-Միրիկ գյուղում ի՞նչ իրավիճակ է։ Խուճապ կա՞ մարդկանց շրջանում։

ԱՏՇ-Կորոնավիրուսի հաստատված դեպքով պայմանավորված, շրջանի և հատկապես այդ ձորակի բնակիչների մոտ որոշակի մտահոգություններ կան, որոնք մեր աշխատանքներով և անհրաժեշտ տեղեկատվության փոխանցմամբ փորձում ենք փարատել: Ամեն ինչ անում ենք, որպեսզի վարակի տարածումը կանխենք: Կարծում եմ, որ մեզ հաջողվել է տեղայնացնել արձանագրված դեպքը:

-Բժշկական կենտրոնի կամ մասնագետների առումով խնդիրներ կա՞ն։ Ի՞նչ է արվում այդ համատեքստում։

ԱՏՇ-Մեր մասնագետները տարբեր փուլերում վերապատրաստման դասընթացներ են անցել, սերտ համագործակցում ենք Հայաստանի մեր գործընկերների հետ, տեսախորհրդակցություններ և տեսասեմինարներ են կազմակերպվում՝ ոլորտի մասնագետների մասնակցությամբ:

-Արցախի խորհրդարանի ընդդիմադիր պատգամավոր Հայկ Խանումյանը նշել է, որ վարակված կինը բազմաթիվ շփումներ է ունեցել ոչ միայն Միրիկ գյուղում, այլև Մոշաթաղում ու Բերձորում։ Նա շեշտել է, որ այդ 3 վայրերում անհնար կլինի ընտրություն անցկացնել։ Այդպե՞ս է, թե՝ ոչ։

ԱՏՇ-Պատգամավորի հայտարարությունը չի համապատասխանում իրականությանը: Ապրիլի 2-ին կորոնավիրուսով վարակված անձը մեկուսացվել է բուժհաստատությունում, իր հետ միայն մի բուժաշխատող է շփվել, ով չի սպասարկել այլ մարդկանց, իսկ տեսակցություն չի թույլատրվել:

Մերի Մարտիրոսյան