Մանվել Գրիգորյանի ընտանիքը փակել է Ակնալիճ տանող ճանապարհը. փաստաբանը պատճառներ է նշում. ԼՈՒՍԱՆԿԱՐՆԵՐ

ԵԿՄ նախկին նախագահ, ԱԺ նախկին պատգամավոր, գեներալ Մանվել Գրիգորյանի ընտանիքի անդամները հողաշերտով փակել են Ակնալիճ համայնքում իրենց պատկանող «Ակնալճի կուղբաբուծական տնտեսություն» ընկերության տարածքի ավտոճանապարհը: Այս մասին Factor.am-ին ահազանգեցին տեղի բնակիչները՝ նշելով, որ չեն կարողանում երեկվանից տարածք մուտք գործել:

Մեզ դիմած բնակիչները նշեցին, որ իշխանափոխությունից հետո, երբ հայտնի է դարձել «Ակնալճի կուղբաբուծական տնտեսություն» ընկերության տարածքը պետությանը նվիրելու փաստը, այն հասանելի է դարձել բնակիչներին: Գյուղացիները կարողացել են այնտեղ գտնվող ջրամբարներից ձուկ որսալ, իսկ մարգագետիններում խոշոր եղջերավորներին արածեցնել:

Այժմ, մեզ փոխանցված լուսանկարների համաձայն, կալվածքի ավտոճանապարհները փակված են հողաթմբերով և քարերով: Բնակիչներն ասում են, որ թեև ոտքով կարող են հասնել ջրամբարների մոտ, սակայն պետք է մեկ կիլոմետր քայլեն:

Մանվել Գրիգորյանի փաստաբան Լևոն Բաղդասարյանը Factor.am-ի հետ զրույցում հաստատեց տեղեկությունները, որ ճանապարհը փակվել է հողաթմբերով: Սակայն, փաստաբանի փոխանցմամբ, Գրիգորյանները փակել են միայն ավտոմեքենաների համար նախատեսված ճանապարհը, ինչի համար պատճառներ են ունեցել:

«Քաղաքացիների համար ճանապարհը բաց է, այս պահին էլ այնտեղ անասունների են արածեցնում: Տարածքը որպես սեփականություն փակված է այն անձանց համար, ովքեր ցանկանում են մեքենայով մտնել այդ տարածք: Պատճառն այն է, որ բարբարոսաբար գողանում են այնտեղի կոմունիկացիաները: Այդ տարածքում կան էկզոտիկ կենդանատեսակներ, իսկ երբ հայտարարվեց, որ հանձնվելու է պետությանը, քաղաքացիները սկսեցին անօրինական մուտք գործել տարածք և գողություն անել: Սա է եղել պատճառը, որ սեփականատիրոջ կողմից փակվել են ավտոճանապարհները, բայց քաղաքացիների համար բաց է, նրանց համար առանձին մուտք կա»,- ասաց նա:

Հիշեցնենք, որ 2018 թվականին Մանվել Գրիգորյանը դիմել էր կառավարությանը՝ ցանկություն հայտնելով պետությանը նվիրել Ակնալիճ համայնքում գտնվող «Ակնալճի կուղբաբուծական տնտեսություն» ընկերության 329 հեկտար տարածքը: Նշենք, որ տարածքում առկա են առանձնատներ, այգիներ, հանգստյան գոտիներ, տարբեր կենդանիների համար նախատեսված վանդակներ, ձիարշավարան, լճակներ:

Պետական գույքի կառավարման կոմիտեի նախագահ Նարեկ Բաբայանը Factor.am-ի հետ զրույցում տեղեկացրեց, որ առայժմ Մանվել Գրիգորյանի գույքը չի պետականացվել:

Հիշեցնենք, որ Մանվել Գրիգորյանին մեղադրանք է առաջադրվել ՀՀ քրեական օրենսգրքի 235-րդ հոդվածի 2-րդ մասով՝ ապօրինի կերպով ռազմամթերք ձեռք բերելու և այլ անձանց հետ նախնական համաձայնությամբ պահելու համար, ինչպես նաև ՀՀ քրեական օրենսգրքի 179-րդ հոդվածի 3-րդ մասի 1-ին կետով՝ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակելու համար:

Գրիգորյանը կալանքից ազատվել էր առողջական խնդիրների պատճառով: Որոշ ժամանակ հիվանդանոցում մնալուց հետո, նա հրաժարվել էր բժշկական ծառայութուններից և տուն գնացել, սակայն, ինչպես տեղեկանում ենք հիվանդանոցից, նրա վիճակը վատացել էր և հետ էր վերադարձել։

«Նաիրի» բժշկական կենտրոնի գլխավոր տնօրեն Անատոլի Գնունին Factor.am-ին մի քանի օր առաջ ասել էր, որ այս դեպքից հետո մի քանի օր հիվանդանոցում մնալուց հետո Մանվել Գրիգորյանը կրկին հրաժարվել է բժշկական ծառայություններից:

«Նա գրեց, որ տեղեկացված է հնարավոր վտանգների մասին, ասաց, որ արդեն մեկ տարուց ավելի է՝ հիվանդանոցում է, էլ չի դիմանում, ուզում է գնալ: Իր կինը, բարեկամներն էլ տեղյակ են, մենք այլևս իրավունք չունեինք նրան հիվանդանոցում պահել»,- ասել էր ԲԿ-ի տնօրենը:

Նարեկ Կիրակոսյան