13.03.2026 | 23:02
Ադրբեջանը ռազմական արտադրանք է արտահանում գրեթե 20 երկիր․ Ասադով
Ստեփանակերտում ճանապարհ փակած և բերման ենթարկված քաղաքացիներն ազատ են արձակվել. ԱՀ ոստիկանություն
19.03.2020 | 16:33
Երեկ Ստեփանակերտում ակցիայի ժամանակ բերման ենթարկված բոլոր քաղաքացիները երեք ժամ անց ազատ են արձակվել: Այս մասին Factor.am-ի հետ զրույցում ասաց Արցախի ոստիկանության հասարակայնության հետ կապերի և տեղեկատվության ծառայության պետ Գառնիկ Ալեքսանյանը:
Նա նշեց, որ ակցիայի մասնակիցներին բերման են ենթարկել Ստեփանակերտի Վազգեն Սարգսյանի փողոցի երթևեկությունը խոչընդոտելու համար:
«Երեկ 18:05-ի սահմաններում իրավախախտում է արձանագրվել, ինչի համար էլ 13 քաղաքացի բերման է ենթարկվել: Վարչական վարույթը հարուցվել է ճանապարհը փակելու, ինչպես նաև ճանապարհային երթևեկությունը խոչընդոտելու համար»,- ասաց նա:
Հիշեցնենք, որ երեկ տեղեկացրել էինք, որ բերման ենթարկվածներն Արցախի հեղափոխական կուսակցության անդամներն են: Այս մասին Factor.am-ի հետ զրույցում ասել էր կուսակցության ներկայացուցիչ, պատգամավորի թեկնածու Արթուր Օսիպյանը:
Ըստ Օսիպյանի՝ իրենք Արցախի նախագահ Բակո Սահակյանի հետ հանդիպման նպատակով փակել էին Ստեփանակերտի Վազգեն Սարգսյան փողոցը: Հանդիպման շրջանակում Արցախի հեղափոխական կուսակցության անդամները Բակո Սահակյանի հետ ցանկացել են քննարկել նախօրեին Մարտունի քաղաքի մուտքի մոտ տեղի ունեցած միջադեպը, երբ քաղաքապետ Հայկ Սարգսյանը, տարածված տեսանյութի համաձայն, թույլ չի տվել, որ վերջիններս մուտք գործեն քաղաք՝ քարոզարշավ իրականացնելու համար:
Նարեկ Կիրակոսյան
