Ո՞ր բանկերն են հետաձգել վարկերի վճարումները

Երկրում հայտարարված արտակարգ դրության պայմաններում Հայաստանում գործող մի շարք բանկեր հայտարարել են վարկային մարումները հետաձգելու մասին։ Հետաձգման ժամկետները և պայմանները տարբեր են։

Հետաձգումների մասին առաջինը հայտարարեց «Ամերիաբանկ»-ը՝ բոլոր ֆիզիկական անձ և անհատ ձեռնարկատեր հանդիսացող հաճախորդների համար նախատեսելով մարտի 13-ից մինչև մայիսի 13-ը ներառյալ վարկային արձակուրդ։

«Արարատ բանկ»-ը նախատեսել է ֆիզիկական և իրավաբանական անձ, ինչպես նաև անհատ ձեռնարկատեր հանդիսացող հաճախորդներին, ցանկության դեպքում, տրամադրել «վարկային արձակուրդ»՝ մարտի 16-ից՝ երկու ամիս ժամկետով։

«Ակբա-Կրեդիտ Ագրիկոլ» բանկը մարտի 16-ից մինչև ապրիլի 30-ը ներառյալ չվճարված վարկերի նկատմամբ տույժ-տուգանքներ չի կիրառի։ Պարտավորությունների կատարման համար կսահմանվի նոր ժամանակացույց։

«Բիբլոս բանկը» որոշում է կայացրել սույն թվականի մարտի 16-ից մինչև մայիսի 16-ը վարկերի մարումների հետաձգման հնարավորություն ընձեռել ֆիզիկական անձ և անհատ ձեռնարկատեր հաճախորդներին՝ բանկ այցելելու անհրաժեշտությունից ազատելու նպատակով:

Evocabank-ը 2 ամիս ժամկետով հետաձգում է SingleTOUCH վարկերի հերթական ամսական մարումները։ Այսինքն՝ բոլոր այն SingleTOUCH վարկառուները, ովքեր պետք է կատարեն իրենց հերթական ամսական մարումները մարտի 17-ից մայիսի 17-ն ընկած ժամանակահատվածում, կարող են մարումներ կատարել մայիսի 17-ից հետո, ինչը ուշացում չի համարվի։

«Արցախբանկը» մինչև 2020թ. մայիսի 1-ը բանկի նկատմամբ վարկային պարտավորությունները չկատարելու դեպքում որևէ տույժ և տուգանք չի կիրառելու, նշվածը պայմանագրային հարաբերությունների խախտում չի համարվելու: Տվյալ դեպքում չմարված վարկային պարտավորությունները կհաշվարկվեն և կբաշխվեն վարկի մնացած ամիսների վրա: Բանկը անհատ իրավաբանական անձանց վարկերի դեպքում առաջարկում է անհատական մոտեցում։

«Հայէկոնոմբանկը» մարտի 16-ից մինչև մայիսի 17-ը վճարում ունեցող ֆիզիկական անձանց կողմից նշված ժամանակահատվածում վարկային պարտավորությունը չկատարելու դեպքում՝ նրանց նկատմամբ տույժեր չի կիրառի և չի համարի պայմանագրային պարտավորությունների չկատարում:

«Ինեկոբանկը» 2020թ.-ի մարտի 10-ից մինչև 2020թ.-ի ապրիլի 30-ը ներառյալ վարկային պայմանագրերի ժամանակացույցով վճարում ունեցող ֆիզիկական անձանց կողմից այդ վճարումները 2020թ.-ի մինչև ապրիլի 30-ը ներառյալ կատարելու դեպքում, նրանց նկատմամբ տույժեր չի կիրառի և չի համարվ պայմանագրային պարտավորությունների չկատարում։

«Արդշինբանկ»-ի ֆիզիկական անձ, անհատ ձեռներեցներ հաճախորդները վարկային պարտավորությունների գծով երկու ամսվա ընթացքում՝ մինչև մայիսի 15-ը, հերթական մարումներ և վճարներ չիրականացնելու դեպքում չեն համարվելու ժամկետանց, հետևաբար՝ տույժ, տուգանքներ չեն հաշվարկվելու: Բանկը իրավաբանական անձանց վարկերի դեպքում առաջարկում է անհատական մոտեցում։

«Յունիբանկ»-ը մինչև ապրիլի 14-ը եղած վարկերի մարման ազատ գրաֆիկի հնարավորություն է տալիս։

«Կոնվերս բանկ»-ի ֆիզիկական անձ, անհատ ձեռնարկատեր հանդիսացող հաճախորդները, սկսած մարտի 16-ից, անհրաժեշտության դեպքում, կարող են վարկի/երի հերթական մարումները, վճարները հետաձգել մինչև 2020 թ. մայիսի 15-ը:

«Հայբիզնեսբանկ»-ն առաջարկում է մարտի 16-ից մինչև մայիսի 30-ը ներառյալ հետաձգել ֆիզիկական անձանց վարկերի հերթական մարումները (մայր գումարները, հաշվեգրված տոկոսագումարները, սպասարկման և այլ վճարները) տվյալ ժամանակահատվածի համար:

ՎՏԲ-Հայաստան Բանկը ֆիզիկական անձ վարկառուներին առաջարկում է 2 ամիս ժամկետով վարկի մարումների ՀԵՏԱՁԳՈՒՄ։

Իսկ Telcell վճարային համակարգը մինչև մարտի 31-ը բոլոր տեսակի բանկային վճարումները, պետծառայության տուգանքները ընդունելու է 0% միջնորդավճարով:

Նշենք, որ Ucom ընկերությունը տեղեկացրել է իր ինտերնետից օգտվող բաժանորդներին, որ երկրում ստեղծված իրավիճակից ելնելով մուծումը չկատարելու դեպքում ինտերնետ կապը չի անջատվի՝ սահմանելով հավելյալ 5 օր ժամկետ մուծման համար։

Կենտրոնական բանկը հորդորել է բոլոր բանկերին՝ անհատական մոտեցում ցուցաբերել հաճախորդներին, որպեսզի վերջիններս խնդրի առաջ չկանգնեն ստեղծված իրավիճակում:

Անժելա Պողոսյան