Հրդեհից տուժած արմավիրցիներն այս գիշեր էլ են դրսում մնալու. ո՞ւր են նայում իշխանությունները

Արմավիր քաղաքի ծայրամասում գտնվող  Սիլիկյան 23/9 վթարային շենքի բնակիչները երեկ ժամը 22:00-ի սահմաններում բռնկված հրդեհի արդյունքում դուրս են փախել բնակարաններից և գիշերն անցկացրել են բակում: Շենքը ողջ գույքով մոխրացել է նրանց աչքի առաջ: Մնացել են միայն պատերը, որոնք ամեն վարկյան կարող են փլվել:

4-րդ կարգի վթարային այս շենքում 13 ընտանիքներ էին բնակվում: Ոմանց օգնել են, տանիք են տվել հարազատները: Ամենաանճարները մնացել են քաղաքային իշխանություններին սպասող: Նրանք պատմում են, որ երեկ գիշերվանից այստեղ հերթապահում են Արտակարգ իրավիճակների նախարարության աշխատակիցները: Բնակիչները նշում են, որ բազմիցս ահազանգել են քաղաքային իշխանություններին շենքի վիճակի մասին, ասել են, որ մի օր տանիքը փլվելու է իրենց գլխին: Բայց նրանց հանգստացրել են՝ ասելով. «Ինչքան կապրեք, կապրեք»:

Քաղաքապետարանից բնակիչներին 60 հազարական դրամ ֆինանսական օգնություն են խոստացել, բայց ժամանակավոր կացարաններում տեղավորելու մասին ոչ մի խոսք: Քաղաքապետարանի աշխատողները ևս դեպքի վայրում էին: Սկզբում չէին ցանկանում ներկայանալ: Հետո, երբ կրքերը թեժացան, որոշեցին պատասխանել մեր հարցերին: Փոխքաղաքապետը հայտնեց, որ Արմավիրի մարզպետարանում խորհրդակցություն է եղել, որ հրդեհից տուժածներին կացարաններ են առաջարկվել, որոնցից նրանք հրաժարվել են: Մինչդեռ հրդեհից տուժածները մեզ հետ զրույցում պնդեցին, որ իրենց կացարան չեն առաջարկել: Այս գիշերը նրանք կրկին բակում են լուսացնելու:

Սյուզան Սիմոնյան