Հասարակություն
16.10.2017 | 19:25Հայաստանում ընտանեկան բռնությունը կանխարգելող օրենքի ընդունման անհրաժեշտություն կա: Factor.am-ի հետ զրույցում նման համոզմունք հայտնեց Հայաստանի Հելսինկյան կոմիտեի նախագահ Ավետիք Իշխանյանը:
«Այդ բնագավառում արված որոշակի հետազոտությունների ծանոթանալուց հետո բավական տխուր պատկեր է երևում: Օրենքի անհրաժեշտության մասին փաստեր է բերվել Արդարադատության նախարարության կողմից, սակայն դա դեռ երևացող մասն է: Մենք ամոթի հասարակությունում ենք ապրում և չենք ուզում այդ հարցերը բարձրաձայնել: Բնագավառը օրենքով կարգավորելու անհրաժեշտություն կար»,- նշեց իրավապաշտպանը:
Կա՞ն արդյոք երաշխիքներ, որ օրենքի ընդումամբ Հայաստանում իրավիճակ կփոխվի, հետաքրքրվեցինք պարոն Իշխանյանից. «Մենք ունենք բազմաթիվ օրենքներ, որոնցից որոշներն անգամ Վենետիկի հանձնաժողովի դրական գնահատականին են արժանացել, բայց չեն գործում: Օրինակ՝ «Խաղաղ հավաքների մասին» օրենքը, որը լավագույններից է, սակայն չի գործում: Բայց այս ամենից ելնելով՝ կարո՞ղ ենք ասել՝ օրենք պետք չի: Իհարկե օրենքի լինելը անհրաժեշտ, բայց ոչ բավարար պայման է»:
Ինչ վերաբերում է օրենքի ընդդիմախոսներին, ապա Իշխանյանն ասաց՝ նրանց կարելի է բաժանել երկու մասի. «Մի մասը բավական անկեղծ է և հանդիսանում է ավանդական կարծրատիպային հայացքների կրող: Նրանք համարում են, որ մեր նահապետական ընտանիքին չպետք է դիպչել: Պատկերացնում եմ, թե այդ մարդիկ ինչպես են ժամանակին սվիններով ընդունել մեր դասական գրողներին, որոնք անդրադարձել են ընտանեկան բռնությանը: Մյուս կողմից` կան նորաստեղծ կազմակերպություններ, որոնք հատուկ ուղղորդված խոսում են օրենքի դեմ՝ խեղաթյուրելով իրավիճակը և հանրությանը մոլորության մեջ գցելով»:
Իրավապաշտպանի համար ամեն դեպքում` օրինագծում կան խնդրահարույց դրույթներ: «Մտահոգիչ է, երբ ոստիկանությանը բավականին մեծ լիազորություններ ենք տալիս, արդյոք մեր ոստիկանությունը պատրա՞ստ է: Ոստիկանության աշխատողները զանազան դասընթացներ են անցնում, սակայն նրանց գործելակերպը չի փոխվում: Գուցե այդ լիազորությունները ոստիկանությանը չտրվի, այլ տրվի հատուկ պատրաստված սոցիալական աշխատողներին»:
Հարցազրույցն ամբողջությամբ՝ տեսանյութում:
Շողիկ Գալստյան
