30.05.2026 | 19:53
«Յունիսպորտը»` ֆուտզալի Հայաստանի չեմպիոն. ՏԵՍԱՆՅՈՒԹ
Նաիրի Հունանյանի և Արման Բաբաջանյանի 2 ժամ տևած զրույցը չի ձայնագրվել
Հասարակություն
27.11.2019 | 12:47
Այս տարվա հոկտեմբերի 24-ին հայտնի դարձավ, որ ԱԺ պատգամավոր Արման Բաբաջանյանը հանդիպել է Հոկտեմբերի 27-ի ահաբեկչությունն իրականացրած խմբի պարագլուխ Նաիրի Հունանյանին և նրա հետ ունեցել աննախադեպ՝ 2 ժամ տևողությամբ զրույց։
Թե՛ ինքնին հանդիպման փաստը, թե՛ դրանից հետո Բաբաջանյանի արած հայտարարությունները փոթորկեցին քաղաքական դաշտը։ Մասնավորապես, պատգամավորը փոխանցեց Հունանյանի որոշ հայտարարություններ, որոնք կապված էին ահաբեկչության դրդապատճառների հետ, իսկ Factor.am-ի հետ զրույցում էլ հայտարարեց, որ Վազգեն Մանուկյանը մասնակցել է Նաիրի Հունանյանի իրագործած ոճիրի ձևավորմանը:
«Զրույցի ընթացքում Վազգեն Մանուկյանի անվան մի քանի հիշատակումը, նրա հանդիպումներից ոգևորված փաստի արձանագրումը Նաիրի Հունանյանի կողմից, ուղղակի ինձ համար համոզիչ է դարձնում, որ Վազգեն Մանուկյանը կարևոր դերակատարություն է ունեցել Նաիրի Հունանյանի տրամադրությունների ձևավորման գործում»,- ասել էր պատգամավորը, որը դիմել էր ՀՀ վարչապետին՝ Հանրային խորհրդի նախագահի պաշտոնից Մանուկյանին պաշտոնանկ անելու պահանջով։
Հունանյանի հետ հանդիպումից հետո իր արած հայտարարությունները կասկածի տակ դնողներին ի պատասխան պատգամավորն ասաց, որ զրույցը տեղի է ունեցել ՔԿՀ ղեկավարի մասնակցությամբ և, ըստ ամենայնի, ձայնագրվել է։
Factor.am-ը գրավոր դիմեց ԱՆ քրեակատարողական ծառայություն՝ նախ Հունանյանի հետ հարցազրույցի, ապա և՝ Արման Բաբաջանյանի ու Նաիրի Հունանյանի զրույցի ձայնագրության ամբողջական կամ մասնակի տրամադրման խնդրանքով։
ՔԿԾ-ից, սակայն, ստացանք ուշագրավ պատասխան․ պարզվեց, որ քրեակատարողական ծառայությունը չի ձայնագրել ահաբեկչության պարագլուխ Հունանյանի և պատգամավորի միջև կայացած այս բացառիկ զրույցը: «Նաիրի Հունանյանի և ՀՀ Ազգային ժողովի պատգամավոր Արման Բաբաջանյանի հանդիպման ձայնագրություն տրամադրելու Ձեր խնդրանքը հնարավոր չէ բավարարել ձայնագրության բացակայության պատճառով»,- ասված է ՔԿԾ պատասխանում։
Հավելենք, որ ավելի վաղ ՔԿԾ ուղարկած հարցման պատասխանից պարզել էինք, որ Արման Բաբաջանյանը վերջին 1 տարում Նաիրի Հունանյանի հետ հանդիպման համար դիմած միակ պատգամավորն է։ Նրանից բացի հանդիպման համար դիմել էին երեք լրատվամիջոց, այդ թվում եւ՝ Factor.am-ը, որոնց հետ, ըստ ՔԿԾ-ի, Հունանյանը հանդիպելու ցանկություն չի ունեցել։
Լիլիթ Շաբոյան
