07.09.2026 | 13:21
ՔՀԿ-ի ատամնաբուժական կենտրոնի զուգարանում թմրանյութի նմանվող նյութեր են հայտնաբերվել
Վերջին 1 տարում ովքեր են ցանկացել հանդիպել Նաիրի Հունանյանին, և ինչու է նա ընտրել հենց Արման Բաբաջանյանին
18.11.2019 | 22:30
Հոկտեմբերի 24-ին հայտնի դարձավ, որ ԱԺ պատգամավոր Արման Բաբաջանյանը հանդիպել է Հոկտեմբերի 27-ի ահաբեկչությունն իրականացրած խմբի պարագլուխ Նաիրի Հունանյանին։
Բաբաջանյանը հայտնել էր, որ Հունանյանի հետ զրույցը տևել է երկու ժամ։ Այս փաստը բազմաթիվ հարցերի ու քննարկումների տեղիք տվեց, շատերը տարակուսեցին, թե ինչու և ինչպես է ստացվել, որ ԱԺ պատգամավորին նման երկարատև հանդիպման հնարավորություն է ընձեռվել, այն դեպքում, երբ նախկինում պատգամավորները Հունանյանին ընդամենը մի քանի վայրկյանով են տեսակցելու հնարավորություն ունեցել։
Factor.am-ը գրավոր հարցմամբ դիմեց ՀՀ ԱՆ քրեակատարողական ծառայություն՝ պարզելու համար, թե ովքեր են վերջին մեկ տարում Հունանյանին հանդիպելու ցանկություն հայտնել, նրանցից քանիսի դիմումն է բավարարվել և ինչու է Հունանյանը ցանկություն հայտնել հանդիպել հենց Արման Բաբաջանյանի հետ։
Մեր հարցմանն ի պատասխան ՀՀ ԱՆ քրեակատարողական ծառայությունից պատասխանել են, որ վերջին մեկ տարում Հունանյանին հանդիպելու խնդրանքով իրենց դիմել է մեկ պատգամավոր՝ Արման Բաբաջանյանը, և երկու լրատվամիջոց՝ «Sputnik Արմենիա»-ն և «Հրապարակ» օրաթերթը։
Հավելենք, որ դեռևս անցած տարի Նաիրի Հունանյանին հանդիպելու խնդրանքով ՔԿԾ էր դիմել նաեւ Factor.am-ը։ ԱՆ քրեակատարողական ծառայությունից, սակայն, մերժում էինք ստացել՝ «Հունանյանի համաձայնության բացակայության հիմքով»։ Մենք նաև տեղեկացանք, որ Բաբաջանյանի դիմումը հանդիպման վերաբերյալ բավարարվել է հենց նույն օրը՝ հոկտեմբերի 24-ին, մինչդեռ մյուս երկու լրատվամիջոցների, դիմումները մերժվել են այն պատճառաբանությամբ, թե Նաիրի Հունանյանը հանդիպման համաձայնություն չի տվել․
«ՀՀ քրեակատարողական օրենսգրքի 92-րդ հոդվածի 7-րդ կետի համաձայն՝ դատապարտյալի լուսանկարահանումը, տեսանկարահանումը և հարցազրույցն ամբողջությամբ իրականացվում են նրա համաձայնությամբ՝ ուղղիչ հիմնարկների ներքին կանոնակարգով սահմանված կարգով»։
Այսպիսով՝ հարցադրումները, թե ինչու է Նաիրի Հունանյանը հենց Արման Բաբաջանյանի հետ համաձայնել հանդիպել, ունի պարզ պատասխան․ քանի որ Աժ պատգամավորներից միայն նա է անցած մեկ տարվա ընթացքում դիմել։
Մեկ այլ հարց է, թե ինչու է Հունանյանը գերադասել իր ասելիքը հայտնել միջնորդավորված՝ պատգամավորի միջոցով, այն դեպքում, երբ հրաժարվել է դա անել երեք լրատվամիջոցներին ուղղակի հարցազրույց տալու ձևով։
Լիլիթ Շաբոյան
