Հայ-ռուսական միջխորհրդարանական հանձնաժողովի նիստում քննարկվել է Վերին Լարսում նոր անցակետ կառուցելու հնարավորությունը

Գյումրիի «Սև բերդ» ամրոցում այսօր անցկացվում է ՀՀ Ազգային ժողովի և ՌԴ Դաշնային ժողովի միջև համագործակցության Միջխորհրդարանական հանձնաժողովի 32-րդ նիստը։ Նիստին մասնակցում են ՀՀ Ազգային ժողովի, ՌԴ Պետդումայի պատգամավորներ, ԵՏՀ ներկայացուցիչներ, Հայաստանի ու Ռուսաստանի  դիվանագիտական կորպուսի ներկայացուցիչներ, ինչպես նաև Շիրակի մարզպետն ու Գյումրիի քաղաքապետը:

Նիստի մեկնարկին բացման խոսքով հանդես եկան հանձնաժողովի համանախագահներ, ՀՀ Ազգային ժողովի նախագահի տեղակալ Ալեն Սիմոնյանն ու ՌԴ Դաշնային խորհրդի նախագահի տեղակալ Յուրի Վորոբյովը՝ կարևորելով երկու երկրների դաշնակցական հարաբերությունները։

«Մեր երկրների միջև դաշնակցային ու գործընկերային հարաբերությունները հիմնված են բարեկամության, դարավոր ավադույթների, եղբայրության, վստահության ու փոխադարձ աջակցության վրա, համահունչ են մեր ժողովուրդների արմատական շահերին։ Երկու երկրների միջպետական հարաբերություններն այսօր բարձր մակարդակի վրա են և շարունակում են ամրապնդվել բոլոր ոլորտներում»,- ասաց ՀՀ Ազգային ժողովի փոխնախագահ Ալեն Սիմոնյանը:

Նա հավելեց, որ երկու երկրների միջխորհրդարանական հանձնաժողովներն ակտիվ աշխատում են։

«Ակտիվ քաղաքական երկխոսությունն ամուր հիմք է առևտրատնտեսական, ռազմաքաղաքական, մշակութային համագործակացության զարգացման համար՝ ինչպես երկկողմ ձևաչափով, այնպես էլ միջազգային կառույցների շրջանակում։ Երկկողմ հարաբերությունների լայն սպեկտորի կարևորագույն բաղադրիչներից է հայ-ռուսական խորհրդարանական փոխգործակցությունը։ Այս համատեքստում կցանկանայի ընդգծել միջխորհրդարական հանձնաժողովի ակտիվ աշխատանքը մեր խորհրդարանների հանձնաժողովների, պրոֆեսիոնալների համատեղ հանդիպումները, նաև այցերը տարբեր բարձր մակարդակներով»,- նշեց Ալեն Սիմոնյանը։

ՌԴ Դաշնային խորհրդի նախագահի տեղակալ Յուրի Վորոբյովն իր հերթին կարևորեց Հայաստանի մեծ ավանդը ԵՏՄ-ի զարգացման և ամրապնդման գործում։

«Հայաստանը 2019 թվականից նախագահում է Եվրասիական տնտեսական միությունում, և այդ շրջանում կարևոր քայլեր են ձեռնարկվել կազմակերպությունն ուժեղացնելու ուղղությամբ»,- ասաց Յուրի Վորոբյովը։

Նշենք, որ նիստի օրակարգում ընդգծված են մի շարք հարցեր։ Մասնակիցները խոսեցին, մասնավորապես, Վերին Լարսում նոր անցակետ կառուցելու հնարավորության մասին, որով ավտոմեքենաների հերթերը կնվազեն և երկու երկրների առևտրաշրջանառությունը կմեծանա։ Ի դեպ, ըստ ներկայացված տվյալների՝ առևտրաշրջանառությունը Հայաստանի ու Ռուսաստանի միջև վերջին տարիներին աճել է շուրջ 3.5 անգամ։

Չ.Է.