20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Կենդանաբանական այգին տարիներ ի վեր դարձել է որոշակի քաղաքական դիվիդենտներ հավաքելու թեմա. Ռուբեն Խաչատրյան
02.11.2019 | 17:26
Կենդանաբանական այգու տնօրենի պաշտոնից ազատման դիմում ներկայացրած Ռուբեն Խաչատրյանն այսօր լրագրողների հետ զրույցում նշեց, որ այգու կենդանիների վրա շների հարձակումների առումով չի բացառում մարդկային գործոնը:
«Անընդմեջ այդ կենդանիների հանկարծամահ լինելը կամ որոշ կենդանիների մահացության դեպքերը, որոնք կապված էին հիվանդության կամ ծերության հետ, շահարկվում էին որպես տնօրենի վատ աշխատանք»,- ասաց Ռուբեն Խաչատրյանն ի պատասխան հարցի, թե ինչ նկատի ուներ դա ասելով. ապա հավելեց. «Հուսով եմ, որ էս միջադեպը վերջնական առիթ կհանդիսանա, որ այգին իր շուրջ ունենա պարիսպ, եթե նույնիսկ դա կարժենա իմ հրաժարականը»:
«Կենդանաբանական այգին տարիներ ի վեր դարձել է որոշակի քաղաքական դիվիդենտներ հավաքելու թեմա՝ տարբեր կուսակցությունների համար, տարբեր ժամանակահատվածներում՝ կլինեն դրանք ընտրությունների ժամանակ, կամ դրանից հետո»,- նկատեց նա:
Իսկ այգու հետ կապված իր առաջիկա անելիքները Խարատրյանը կպարզի երկուշաբթի, երբ կխոսի քաղաքապետի հետ։ Նա մտադիր է, անկախ պաշտոնից, համագործակցել քաղաքային իշխանությունների և այգու ղեկավարության հետ. «Ես միշտ լինելու եմ այգու կողքին»:
Իսկ մինչ այդ, այսօր մի խումբ անձինք՝ կենդանասերներ, Երևանի կենդաբանական այգու նախկին ու ներկա աշխատակիցներ բողոքի ակցիա էին անում այգու առջև՝ պահանջելով պարզաբանել, թե ինչի վրա է ծախսվել այգու բյուջեն, և որտեղ են որոշ կենդանիներ: Նրանց խոսքով՝ այգու տնօրենի միայն ազատման դիմումն իրենց չի բավարարում. այգուց բազմաթիվ կենդանիներ են պակասում և իրենք պահանջում են, որ նախևառաջ վերադարձվեն մորուքավոր անգղերը:
Ակցիայի մասնակիցների հավաստմամբ՝ Խաչատրյանը Կենդանաբանական այգու մորուքավոր անգղերին ոչ համարժեք փոխանակման միջոցով տարել է իր ղեկավարած Վայրի բնության և մշակութային արժեքների պահպանման հիմնադրամ:
