ՌԴ-ն բողոքի նոտա կհղի Հայաստանին՝ զենքի մրցույթի խափանման հետ կապված

Մոսկվան բողոքի նոտա կհղի Երևանին՝ զենքի մրցույթի խափանման հետ կապված, որին մասնակցել է ռուսական ORSIS ընկերությունը: Այս մասին նշվում է փաստաթղթում, որի պատճենը հայտնվել է ՌԻԱ Նովոստիի տրամադրության տակ:

Աղբյուրը հիշեցնում է, որ մայիսին ՀՀ Պաշտպանության նախարարությունն առաջին անգամ մի քանի միլիարդ դոլար արժողությամբ ռազմական տեխնիկայի մատակարարման մրցույթ է հայտարարել: Պահանջված չափանիշներին համապատասխանել է միայն ռուսական «Промтехнологии» խմբի մաս կազմող ORSIS-ը, որը տարիներ շարունակ Հայաստանին զենք և զինամթերք է մատակարարել:

Ավելի ուշ հայտնի դարձավ, որ մրցույթը փակվել է՝ առանց պատճառները պարզաբանելու: Օգոստոսին ORSIS-ը դիմել է վերաքննիչ հանձնաժողովին, իսկ Հայաստանում նրա շահերը ներկայացնող իրավաբանը հայց է ներկայացրել:

Բողոքի նոտան արդեն ռուսական ԱԳՆ-ում է և առաջիկա օրերին դիվանագիտական ուղիներով կփոխանցվի հայկական կողմին, ՌԻԱ Նովոստիին ասել է իրավիճակին ծանոթ աղբյուրը:

Փաստաթուղթը ստորագրվել է հոկտեմբերի 22-ին, ՌԴ առևտրի և արդյունաբերության փոխնախարար Օլեգ Ռյազանցևի կողմից: Այն հասցեագրվել է ՀՀ պաշտպանության նախարար Դավիթ Տոնոյանին: Դրանում նշում է, որ մրցույթին ORSIS-ի մասնակցության հայտն «առանց ծանրակշիռ հիմնավորման մերժվել է», իսկ ընկերությունը ներառվել է «անբարեխիղճ մատակարարների ցանկում»:

«Խնդրում եմ դիտարկել ստեղծված իրավիճակը և ցուցումներ տալ այն կարգավորելուն  ուղղված միջոցներ ձեռնարկելու մասին»,- նշված է ռուսական ԱԳՆ-ին ուղղված դիմումում: