04.10.2026 | 15:18
ՆԳ նախարարն ու ղեկավար կազմը հարգանքի տուրք են մատուցել զոհված ոստիկանների հիշատակին
Հայաստանում դիակային դոնորներից փոխպատվաստում է նախատեսվում ու գործելու է ոչ թե թույլատրելու, այլ հրաժարվելու ինստիտուտը. նախարար
Հասարակություն
21.10.2019 | 13:00
Հայաստանում 2-3 տարվա ընթացքում հնարավոր կլինի դիակային դոնորներից օրգանների փոխպատվաստումն իրականություն դարձնել. այս մասին լրագրողների համար գրիպի թեմայով կազմակերպված սեմինարի շրջանակում ասել է ՀՀ առողջապահության նախարար Արսեն Թորոսյանը:
«Դա զուտ մարդասիրական քայլ է: Բազմաթիվ ենթակառուցվածքներ են պետք դիակային դոնորներից փոխպատվաստման համար՝ սկսած բժշկական կենտրոններից, վերջացրած իրավական, էլեկտրոնային համակարգերով: Պետք է անենք, քանի որ դրանով փրկելու ենք շատ վատ կյանքի որակ ունեցող մարդկանց կյանքեր, հիմնականում քրոնիկ երիկամային անբավարարություն ունեցող, հեմոդիալիզ ստացող անձինք ենք»,- ասել է Թորոսյանը:
Նախարարի փոխանցմամբ, քանի դեռ ուղեղային մահ ախտորոշումը տրված չլինի, օրգաններ չեն կարող վերցնել դոնորից. «Հայաստանում դիակային փոխպատվաստման համար գործելու է ոչ թե թույլատրելու, այլ հրաժարվելու ինստիտուտը: Ով չի ցանկանում, որ իր ուղեղային մահից հետո իր օրգանները օգտագործվեն այլ մարդու կյանքը փրկելու համար, կարող է հրաժարականի դիմում գրել, և մենք ռեեստրում կտեսնենք, որ այդ մարդու օրգաններն օգտագործելու իրավունք չունենք: Իսկ ով չի գրի, օրգանները կկարողանանք օգտագործել»:
