ՆԱՏՕ-ի գլխավոր քարտուղարը մեր հարցին տվեց բացառիկ պատասխան. Անդրանիկ Քոչարյան. ՏԵՍԱՆՅՈՒԹ

ՀՀ պաշտոնական պատվիրակությունը հոկտեմբերի 11-14-ը Լոնդոնում մասնակցել է ՆԱՏՕ-ի Խորհրդարանական վեհաժողովի 65-րդ նստաշրջանին: ԱԺ «Իմ քայլը» խմբակցության պատգամավոր, պատվիրակության ղեկավար Անդրանիկ Քոչարյանի խոսքով՝ Լոնդոն մեկնելուց առաջ պատրաստվել են բոլոր այն զեկույցների շահարկմանը, որոնք կարող էին օգտագործել Ադրբեջանի կեղմից, և որը կարող էր կրկին բարձրաձայնել, թե Հայաստանը, իբր, «գրավել է» Ադրբեջանի տարածքների 20 տոկոսը, ինչը չի տեղավորվում Մինսկի խմբի՝ մինչ այսօր տված որևէ բանաձևում:

«Մենք այդ բոլոր զեկույցների մեջ պատրաստել էինք նաև մեր հիմնական հնչեցվելիք հարցը: Իհարկե, ԱԳՆ-ի համապատասխան կառույցների հետ մի քանի հանդիպում ունեցանք՝լավ գիտակցելով, որ ՆԱՏՕ-ի գլխավոր քարտուղարի մասնակցությունն այդ հնարավորությունը տալիս է: Ճիշտ է, պատրաստել էինք մի քանի հարցեր, բայց կանգնեցինք մեկ հարցի տարբերակի վրա: Ակնկալում էինք, որ կստանանք պատասխանի այդ բովանդակությունը, և ՆԱՏՕ-ի գլխավոր քարտուղարը, ըստ էության, մեր հարցին տվեց բացառիկ պատասխան, որի մասին մամուլում արդեն տարածվել է»,- այսօր ԱԺ-ում հրավիրած ասուլիսում նշեց Անդրանիկ Քոչարյանը:

Հիշեցնենք, որ ՆԱՏՕ-ի գլխավոր քարտուղար Յենս Ստոլտենբերգը հոկտեմբերի 14-ին Լոնդոնում Դաշինքի Խորհրդարանական վեհաժողովի նիստի ժամանակ ասել էր, որ ՆԱՏՕ-ն աջակցում է ԵԱՀԿ Մինսկի խմբի համանախագահների՝ Լեռնային Ղարաբաղի հակամարտության քաղաքական լուծման ջանքերին:

Անդրանիկ Քոչարյանի փոխանցմամբ՝ արդեն պատրաստվում են Կիևում կայանալիք գարնանային նստաշրջանին, որի ժամանակ ևս շարունակելու են իրենց նախաձեռնողական մոտեցումները: «Ամեն ինչ համընկավ նրա հետ, որ Թուրքիան Սիրիայում ռազմական գործողություններ էր սկսել, և այս Վեհաժողովի մթնոլորտը, ըստ էության, պտտվում էր այդ իրադարձության շուրջ, թեմաներն առնչվում էին ընդհանրապես այն զինված ուժերի ապագային՝ ՆԱՏՕ-ի անդամ պետությունների հետ կապված և այն մտահոգություններին, որոնք առնչվում էին ՌԴ-ի, Չինաստանի զինված ուժերի զարգացումներին: Քանի որ բոլորը գիտեին, որ մասնակցելու է նաև ՆԱՏՕ-ի գլխավոր քարտուղարը, Սիրիայի թեման դարձավ ամենակարևոր մտահոգությունը: Կարծեք թե ՆԱՏՕ-ն գիտակցում էր, թե այնտեղ ինչ է կատարվում, բայց իրավական առումով խնդիր չէր տեսնում, ինչը դժգոհություն առաջացրեց ՆԱՏՕ-ի անդամ պետությունների խորհրդարանական պատվիրակությունների շրջանում»,- շեշտեց նա:

Մանրամասները՝տեսանյութում:

Նարեկ Կիրակոսյան