«Շնորհակալությո՛ւն, աշխարհ». Երախտագիտության յուրահատուկ ֆլեշմոբ Գյումրիում՝ «Ավրորա ֆորումի» շրջանակում. ԼՈՒՍԱՆԿԱՐՆԵՐ

«Ավրորա ֆորումի» շրջանակում հոկտեմբերի 17-ը հայտարարված էր Գյումրու օր։ Մարդասիրական նախաձեռնության հիմնական միջոցառումներն անցկացվեցին հենց Գյումրիում՝ մարդասիրության, բարեկամության ու երախտագիտության խորհրդի ներքո։

Միջոցառումների մեկնարկը տրվեց Գյումրիի Վարդանանց հրապարակում՝ Երախտագիտության՝ «Thank you, world» ֆլեշմոբով, որին մասնակցում էին Գյումրիի դպրոցների, մանկատների, հատուկ հաստատությունների սաները։  Դպրոցականներն այսպիսով իրենց մարդասիրական յուրահատուկ ֆոտոուղերձը հղեցին աշխարհին՝ կրկնելով նաև 100 տարի առաջ Ալեքսանդրապոլում ցեղասպանությունից փրկված մանուկների կողմից արված «AMERICA WE THANK YOU» ակցիան։ Այն արվել էր 1920-ական թվականներին 2.000 հայ որբերի կողմից, որոնք այդ կերպ իրենց շնորհակալությունն են հայտնել Մերձավոր Արևելքի ամերիկյան նպաստամատույց կոմիտեին՝ ցեղասպանությունից փրկված հայ գաղթականներին ու որբերին օգնելու համար։

Ի դեպ՝ «Ավրորա ֆորումի» շրջանակում կազմակերպված միջոցառումներին մասնակցելու Գյումրի էին եկել նախաձեռնության համահիմնադիրներ Ռուբեն Վարդանյանն ու Նուբար Աֆեյանը, Նիկոլա Ազնավուրը, «Ավրորա» մրցանակի դափնեկիրներ Թոմ Քաթինան ու Մարգարեթ Բարանկիցեն, այս տարվա նոմինանտներն ու բարի կամքի դեսպանները, որոնք ևս մասնակցեցին Երախտագիտության ֆլեշմոբին։

«Սա յուրահատուկ շնորհակալություն է այն մարդկանց, որոնք շուրջ 100 տարի առաջ մոտ մեկ միլիոն կյանք են փրկել, օգնել 130 հազար որբերի»,- իր խոսքում ասաց «Ավրորա» մրցանակի դափնեկիր Թոմ Քաթինան։

Հյուրերը նաև շրջայց կատարեցին Գյումրիի պատմական կենտրոնում՝ ծանոթանալով քաղաքի ճարտարապետությանն ու մշակութային ժառանգությանը, եղան «Սև բերդ» ամրոցում։

Այնուհետև տեղի ունեցավ Գյումրիի «Բարեկամություն» զբոսայգու վերակառուցմանը նվիրված հանդիսավոր միջոցառումը, որը երկրաշարժից հետո վերածվել էր տնակային ավանի։ Վերականգնումից հետո այգին դառնալու է զբոսաշրջային վայր, ինչպես նաև հարթակ ներկայիս սոցիալական նախաձեռնությունների համար՝ խթանելով սոցիալական ձեռնարկատիրության նոր սերնդի գաղափարները և աջակցելով դրանց զարգացմանը:

Նշենք, որ դեռ 2018 թվականին «Հայաստանի զարգացման նախաձեռնություններ» (IDeA) հիմնադրամը հանդես էր եկել այգին վերակառուցելու նախաձեռնությամբ։

Մարդասիրության տոնն ավարտվեց Վարդանանց հրապարակում՝ Վլադիմիր Ավետիսյան և D’Black Blues Orchestra միջազգային բլյուզ խմբի համերգով, որոնց միացան նաև Bambir ֆոլկ-ռոք խումբը, TmbaTa նվագախումբը:

Չ.Է.