Գյումրիում ավտոմաքսատունը սկսել է աշխատանքը. մաքսազերծվել են առաջին ավտոմեքենաները

Այսօրվանից Գյումրիի Հյուսիսային մաքսատուն-վարչությունում մեկնարկել  է որոշ խմբի ավտոմեքենաների մաքսազերծման գործընթացը։ Խոսքը Վրաստանից ու Ճապոնիայից արտահանված և հոկտեմբերի 14-ին Հայաստան ներմուծված թեթև մարդատար ավտոմեքենաների մաքսային ձևակերպման մասին է։

Իսկ եթե ավտոմեքենաները սահմանը հատել են հայ-իրանական հատվածում, ապա ձևակերպումներն իրականացվում են Սիսիանի Հարավային մաքսատուն- վարչությունում։

Նշենք, որ ասվածը դեռևս վերաբերվում է միայն թեթև մարդատար ավտոմեքենաներին:

Տրանսպորտային մյուս միջոցների մաքսային ձևակերպումներն առայժմ իրականացվելու են ապակենտրոնացված եղանակով՝ հայտարարատուի նախընտրած մաքսատուն-վարչությունում:

Դրանք են 10 և ավելի մարդ (ներառյալ վարորդը) տեղափոխելու համար նախատեսված շարժիչային տրանսպորտային միջոցներ ներառող ԱՏԳ ԱԱ 8702, բեռնատարներ ներառող ԱՏԳ ԱԱ 8704 և հատուկ նշանակության ավտոմեքենաներ ներառող ԱՏԳ ԱԱ 8705 ապրանքային խմբերում դասվող ավտոմեքենաները, ինչպես նաև ԱՏԳ ԱԱ 8703 խմբի այն ավտոմեքենաները, որոնք տեղափոխվում են բեռնարկղերով:

Ընդհանուր առմամբ, ավտոմեքենաների մաքսային գործառնությունները սահուն կերպով իրականացնելու համար գործընթացը կազմակերպվում է փուլ առ փուլ, որի մեկնարկը այսօր տրվեց։

Առավոտյան ժամը 9։00-ից առանց խնդիրների,  հերթերի ու կուտակումների մարդիկ մաքսազերծել են իրենց մեքենաները։ Դեռ նախատեսվում է Հյուսիսային մաքսատանը օրական 300-400 մեքենայի մաքսային ձևակերպում իրականացնել, որի ծավալներն հետագայում կավելանան։ Ձևակերպման համար նախատեսվում է 20-25 րոպե։

Նշենք, որ Գյումրիում ակտիվորեն ընթանում են ավտոմաքսատան կառուցման աշխատանքները։ Պաշտոնական բացումը նախատեսվում էր հոկտեմբերի 11-ին, սակայն ժամկետները երկարաձգվեցին։ Արտաքին տնտեսական գործունեության կենտրոնի բացումից հետո այստեղ են տեղափոխվելու բոլոր տրանսպորտային միջոցների մաքսային ձևակերպումների հետ կապված բոլոր գործառույթները: Կենտրոնի կառուցման համար Կառավարությունը հատկացրել է 181 մլն դրամ։