«Հյուսիսային պողոտայի» գործով ունեզրկված մի կին հեղափոխությունից 5 օր առաջ մահացավ՝ այդպես էլ չտեսնելով բաղձալի հաղթանակը. Ջուլհակյան. ՏԵՍԱՆՅՈՒԹ

«Այս տարվա հուլիսի 26-ը ցնցեց համացանցը: Հրապարակվեց ՄԻԵԴ վճիռը, ըստ որի՝ ՀՀ կառավարությունը պետք է քաղաքացի Յուրի Վարդանյանի սեփականության իրավունքները խախտելու համար վճարեր 1 մլն 600 հազար եվրո: Եվ սա ընդամենը մեկ գործով մեկ քաղաքացու, իսկ այսպիսի վճիռներ դեռ լինելու են: Յուրի Վարդևանյանն իր կյանքի լավագույն օրերը ծախսեց այս վճռի համար, պարոն Վարդանյանին որպես օրինակ եմ բերում, բայց ձեզանից յուրաքանչյուրն են անցել սրա միջով»,- այսօր ԱԺ-ում ունեցած ելույթում ասաց պատգամավոր Արուսյակ Ջուլհակյանը:

Խորհրդարանում այսօր լսումներ են կազմակերպվել՝ «Պետության կողմից «Հյուսիսային պողոտա-Կասկադ» ծրագրով բացառիկ գերակա հանրային շահ ճանաչելու հետեւանքով սեփականության իրավունքի ոտնահարման խնդիրները» թեմայով, որին հրավիրված են հասարակական սեկտորի ներկայացուցիչներ:
Ջուլհակյանը հարց բարձրացրեց, թե ինչ է լինելու այն մարդկանց հետ, ովքեր չեն դիմել ՄԻԵԴ:

«Սա մի հարց է, որին պետք է տանք պատշաճ պատասխան: Մեկ այլ կարևոր հարց. որքանո՞վ է արդարացի բեռը դնել ՀՀ քաղաքացու վրա: Այստեղ է, որ մեզ պետք է օգնեն ապօրինի ծագում ունեցող գույքի բռնագանձման կարգավորումները»,- ասաց պատգամավորը:

Նա խոսեց նաև ունեզրկված քաղաքացիների հետ իր հանդիպման մասին՝ ասելով. «Օգոստոսին ձեզանից ոմանց հետ ԱԺ-ում հանդիպեցի, և այն ամենը, ինչ ասացիք, ցնցեց իմ ներաշխարհը, խառնեց իրար, և ես երկու օր շարունակ փորձում էի հասկանալ` ինչ եմ լսել ու ինչպես է հնարավոր ապրել այն տեղեկատվությամբ, որը լսել էի»:

Պատգամավորը չմանրամասնեց, թե ինչ է լսել, բայց ասաց, որ մինչ այդ պահը իր համար «ավազակապետություն» ասվածը սոսկ բառ էր, դրանից հետո հասկացել է դրա իմաստը:

«Եվ մեկ այլ տեսարան էլ, որ ինձ վրա խորը և ցավալի ազդեցություն է ունեցել, դա տեսարան էր, երբ մի կին իր իրավունքների համար պայքարում էր՝ ասելով՝ ես վստահ եմ, որ մենք հաղթելու ենք: Չէ՞ որ պետությունը պետք է հասկանա, որ սխալ է անում: Ես մեծ ցավով պետք է նշեմ, որ այս կինը Նունե Վարդունին էր, որ մահացավ հեղափոխությունից 5 օր առաջ՝ այդպես էլ, կներեք, չտեսնելով այն բաղձալի հաղթանակը»,- ասաց պատգամավորը:

Մանրամասները՝ տեսանյութում:

Նարեկ Կիրակոսյան