06.06.2026 | 16:51
Հայաստանի հավաքականի մեկնարկային կազմը Ղազախստանի դեմ խաղում
«Լույս» հիմնադրամին 2018 թվականին 2 մլրդ 410 մլն դրամ են փոխանցել
Հասարակություն
04.10.2019 | 19:14
«Լույս» մշակութային, գիտական և կրթական հիմնադրամին «Հայաստանի Հանարապետության կառավարության աշխատակազմ պետական կառավարչական հիմնարկը» 2018 թվականին 47 մլն 291 մլն դրամ է փոխանցել: Գումարն ուղղվել է աշխարհի առաջատար բարձրագույն ուսումնական հաստատություններ ընդունված և կրթությունը շարունակող հայազգի ուսանողների կրթաթոշակի ծրագրին: Նույն նպատակով ևս 90 մլն դրամի նվիրաբերություն է փոխանցվել իրավաբանական անձանց կողմից: Այս մասին Factor.am-ը տեղեկանում է «Լույս» հիմնադրամի նախորդ տարվա ֆինանսական հաշվետվությունից:
Իրավաբանական անձանցից հիմնադրամին փոխանցվել է ևս 2 միլիարդ 142 մլն դրամ՝ սոցիալական, մշակութային, կրթական ու գիտական ծրագրերի իրականացման համար:
Մշակութային ծրագրերին եղել է նաև նվիրաբերություն՝ 131 մլն 541 հազար դրամ: Ընդհանուր հիմնադրամին փոխանցվել է 2 մլրդ 410 մլն դրամ:
2018 թվականի ընթացքում «Լույս» հիմնադրամը աշխարհի առաջատար բարձրագույն ուսումնական հաստատություններ ընդունված ու կրթությունը շարունակող հայազգի ուսանողների կրթաթոշակի ծրագրին ինչպես նաև կրթական, գիտական, մշակութային ու սոցիալ-մշակութային ծրագրերի համար ընդհանուր ծախսել է 1 միլիարդ 947 միլիոն դրամ:
Հիմնադրամի կայքի համաձայն՝ «Լույս»-ը հիմնադրել են ՀՀ երրորդ նախագահ Սերժ Սարգսյանը և ՀՀ նախկին վարչապետ Տիգրան Սարգսյանը: Նույն աղբյուրի փոխանցմամբ՝ հիմնադրամի գործադիր խորհրդի կազմում են Սերժ Սարգսյանը, Տիգրան Սարգսյանը, ֆինանսների նախկին նախարար Վարդան Արամյանը, նախկին փոխվարչապետներ Արմեն Գևորգյանը և Վաչե Գաբրիելյանը: Նրանք ՀՀԿ անդամներ են:
Հիմնադրամի տնօրենն այս պահին արդարադատության նախկին նախարար Դավիթ Հարությունյանն է: Նա փոխարինեց Վիգեն Սարգսյանին, քանի որ վերջինս մեկնել է ԱՄՆ ուսանելու:
Հիշեցնենք, որ նախորդ տարվա մայիսին հիմնադրամը հայտարարություն էր տարածել, որ դադարեցնում է գործունեությունը, իսկ սեպտեմբերին մեկ այլ հայտարարությամբ էլ տեղեկացրին, որ «Լույսը» շարունակում է իր գործունեությունը:
Նարեկ Կիրակոսյան
