Գեղեցիկ չէր Անդրանիկ Քոչարյանի ձևակերպումը․ Արարատ Միրզոյան. ՏԵՍԱՆՅՈՒԹ

ԱԺ նախագահ Արարատ Միրզոյանն այսօր անդրադարձել է ԱԺ նախկին փոխնախագահ Արփինե Հովհաննիսյանի հասցեին իր խմբակցության պատգամավոր Անդրանիկ Քոչարյանի որակումներին։

«Ինչ խոսք, գեղեցիկ չէր ձևակերպումը, բայց ոչ միայն կոնկրետ Անդրանիկ Քոչարյանի դեպքում։ Մենք տեսնում ենք վերջին ամիսներին Հայաստանում բանավեճի, քննադատության մեջ, անկախ անձից, ոչ վայելուչ ձևակերպումներ, որոնք անցանկալի են, կարիքը չկա դրանց»,-ասել է պարոն Միրզոյանը։

Նա բոլորին կոչ է անում քննադատության, քաղաքական բանավեճի ընթացքում պահպանել կոռեկտության սահմանները։ ԱԺ նախագահի պատկերացմամբ նույնիսկ Արփինե Հովհաննիսյանն է իրեն ոչ վայելուչ ձևակերպումներ թույլ տվել․ «Արփինե Հովհաննիսյանի կողմից Դանիել Իոաննիսյանին «հիվանդ» անվանելը, արդարադատության նախարարին «անուղեղ» անվանելը հիմք չեն տալիս մի ուրիշ մարդուն կամ հենց թիրախ հանդիսացող մարդուն թիրախ դարձնել»։

Նա, ի դեպ, առանձնապես կողմ չէ այս հարցով ԱԺ էթիկայի հանձնաժողովի ձևավորմանը։ «Լավ կլինի, օրինակ, Արփինե Հովհաննիսյանը մի կարճ պարզաբանում տա էն մասին, թե ինչի էթիկայի հանձնաժողով չի ստեղծվել բազմաթիվ դեպքերում, երբ, իմ խորին համոզմամբ, շատ տգեղ, ոչ կոռեկտ անձնական վիրավորանքներով լի ձևակերպումներ են եղել բազմաթիվ պատգամավորների հասցեին»։

Պարոն Միրզոյանին լրագրողներից մեկը տեղեկացրեց, որ նաև հենց դրա համար ՀՀԿ-ն այսօր իշխանության մեջ չէ, բայց դա նշանակու՞մ է, որ նույնը պիտի անի նոր իշխանությունը։ «Ես կարծում եմ, որ էթիկայի հանձնաժողովը,- ես սա էլ եմ համարում լուրջ դեպք,- չափազանց լուրջ դեպքերի է վերաբերվում, և եթե այս գործիքը սկսի չարաշահվել, այն կարող է յուրօրինակ մահակ դառնալ պատգամավորների դեմ, և դա կարող է կաշկանդել նրանց քաղաքական գործունեությանը և իրենց դիրքորոշում հայտնելուն»,- ասաց պարոն Միրզոյանը։

Մանրամասները՝ տեսանյութում:

Մհեր Արշակյան