«Հորդորողը ես եմ եղել». սուր երկխոսություն Արարատ Միրզոյանի և Արսեն Թորոսյանի միջև. ՏԵՍԱՆՅՈՒԹ

Այսօր Աժ-ում քննարկվում էր Մաշկաբանության և սեռավարակաբանության բժշկագիտական կենտրոնի մասնավորեցման հետ կապված օրենքի նախագիծը, որտեղ կար երկու հակադիր կարծիք: Կառավարության հետ հարցուպատասխանի ժամանակ ԱԺ «Իմ քայլը» խմբակցության պատգամավոր Սուրեն Գրիգորյանն առողջապահության նախարար Արսեն Թորոսյանից հետաքրքրվեց. «ԱԺ-ն ասում է՝ չկա անհրաժեշտություն մասնավորեցման, Դուք ասում եք՝ կա, ինչո՞ւ»:

Նշենք, որ ԱԺ նախագահ Արարատ Միրզոյանը նախագծի քննարկման ժամանակ դիտողություն էր արել առողջապահության փոխնախարար Հովհաննես Հարությունյանին՝ նշելով, որ կառաջարկեր քիչ փորձել ԱԺ-ին իր տեղը ցույց տալ կամ սովորել աշխատել:

Հարցուպատասխանի ընթացքում ԱԺ նախագահի այս կոչին պատասխանեց նախարար Արսեն Թորոսյանը:

«Մենք կոչ ենք անում նմանատիպ նախագծեր նախաձեռնելուց առաջ առնվազն ինֆորմացիայի տիրապետելու մակարդակում մեզ հետ համագործակցել, չնայած, դրան ի պատասխան, ստանում ենք հորդորներ, որ չսովորեցնենք, թե ինչպես է պետք աշխատել Ազգային ժողովին»,- ասաց նա:

ԱԺ նախագահը Թորոսյանի հայտարարությունը ևս անպատասխան չթողեց՝ հորդորելով տեղեկանալ մանրամասներին: «Ի գիտություն, պարո՛ն Թորոսյան, էդ որ ասում եք՝ հորդորել էին ձեր տեղակալին, էդ հորդորողը ես եմ եղել, և դա եղել է ի պատասխան Ազգային ժողովին դիմելիս ոչ անհրաժեշտ կոռեկտության սահմանները պահելու համար: Խնդրում եմ, տեղեկացեք մանրամասներին»,- ասաց Արարատ Միրզոյանը:

Մանրամասները՝ տեսանյութում: