24.04.2026 | 23:32
Կապանում ջրանջատում կլինի
Արթուր Վանեցյանն Արցախում է. հայտնի է այցի նպատակը
Քաղաքականություն
28.09.2019 | 14:20
Ազգային անվտանգության ծառայության նախկին տնօրեն, Հայաստանի ֆուտբոլի ֆեդերացիայի նախագահ Արթուր Վանեցյանը գտնվում է Արցախում: Տեղեկություններ կային, որ նա հանդիպելու է Արցախի հանրապետության ղեկավար կազմի որոշ ներկայացուցիչների հետ:
Factor.am-ը պարոն Վանեցյանին խնդրեց մեկնաբանել, թե ինչ նպատակով է մեկնել Արցախ:
«Իմ անձնական կյանքը, ինչ կարեւոր է, թե ես որտեղ եմ: Այո՛, Արցախում եմ, բայց պետական մակարդակի ոչ մի հանդիպում նախատեսված չի: Արցախում եմ Պարգեւ Սրբազանի հրավերով՝ Արցախի թեմի 30-ամյակի միջոցառումներին մասնակցելու համար»,- ասաց Արթուր Վանեցյանը:
Հիշեցնենք, որ Արթուր Վանեցյանի ԱԱԾ տնօրենի պաշտոնից հեռանալու մասին տեղեկությունները հայտնի դարձան սեպտեմբերի 16-ին՝ վարչապետ Նիկոլ Փաշինյանի մամուլի ասուլիսի ժամանակ:
Նույն օրն Արթուր Վանեցյանն աղմկոտ հայտարարություն տարածեց, կոչ անելով իշխանություններին «Կանգ առնել», բայց, թե հատկապես ինչ հարցերի էր վերաբերում «կանգ առի» կոչը, ոչ Արթուր Վանեցյանը, ոչ էլ իշխանությունները չմեկնաբանեցին:
Կառավարությունը պաշտոնապես հայտարարեց, որ Արթուր Վանեցյանի աշխատանքի արդյունքները չի գոհացրել վարչապետ Նիկոլ Փաշինյանին, ինչն էլ եղել է պաշտոնանկության պատճառ:
Նարեկ Կիրակոսյան
