16.11.2024 | 22:58
«Մանկական Եվրատեսիլ – 2024»-ում հաղթեց Վրաստանը
Ստամբուլի «Ժամանակ»-ը հայտնում է Հայոց պատրիարքի ընտրության կանոնագրի՝ Պատրիարքարան հասնելու մասին
23.09.2019 | 22:12
Ստամբուլի հայկական «Ժամանակ» օրաթերթը հայտնում է, որ Կ. Պոլսի Հայոց պատրիարքի ընտրության վերաբերյալ Թուրքիայի կառավարության գրավոր կանոնագիրը հասել է Պոլսի Հայոց պատրիարքարան:
Թուրքիայի Հայոց 85-րդ պատրիարքի ընտրության կանոնադրությունը Գում Գափու է հասել սեպտեմբերի 23-ին:
Ինչպես գրել է թերթը՝ այս պահին կանոնադրության բովանդակության վերաբերյալ հստակ տեղեկություններ չկան: Թերթը կապ է հաստատել նաև Պատրիարքական տեղապահ Տ. Սահակ Եպսկ. Մաշալյանի հետ, որը հաստատել է, որ ընտրության կանոնագիրն արդեն հասել է Պատրիարքարան: Սակայն նա կանոնադրության բովանդակության մանրամասնություններ չի փոխանցել: Նախաձեռնակ մարմինը Գում Գափուում հերթական ժողով կանի: Պատրիարքարանը երեկոյան կայանալիք ժողովի վերջում կանոնադրության բովանդակության վերաբերյալ հայտարարություն կպատրաստի:
Սեպտեմբերի սկզբին Թուրքիայի ներքին գործերի նախարար Սուլեյման Սոյլուն հայտարարել էր, որ մոտ մեկ շաբաթից պատրաստ կլինի Հայոց պատրիարքի ընտրության կազմակերպման վերաբերյալ կառավարության կողմից ներկայացվելիք կանոնագիրը։ Օգոստոսի 30-ին Թուրքիայի նախագահ Ռեջեփ Թայիփ Էրդողանը ընդունելություն էր կազմակերպել, որին մասնակցել են նաև Պոլսո Հայոց պատրարքի տեղապահ Սահակ եպիսկոպոս Մաշալյանը և Սուրբ Փրկիչ հայկական հիվանդանոց հիմնադրամի նախագահ Պետրոս Շիրինօղլուն։ Ավելի վաղ լրատվամիջոցներում նշվել էին նաև հավանական թեկնածուների անուններ:
