Ամենայն Հայոց Կաթողիկոսը՝ եկեղեցիների կառուցման մասին

Ն.Ս.Օ.Տ.Տ. Ամենայն Հայոց Կաթողիկոս Գարեգին Բ-ն դժվարանում է հստակ գնահատական տալ, թե որն է արտագաղթի պատճառը։

«Պատճառները բազմաթիվ են ու զանազան, պետք է բոլորս գիտակցենք, որ մշտապես պատերազմի վտանգի առջև կանգնած ենք։ Ընտանիքներ կան, որոնք ցանկանում են այդ վտանգից զերծ մնալ։ Երկիրը տնտեսական շրջափակման մեջ է, և սա նույնպես ազդում է մեր ժողովրդի բարեկեցիկ կյանքի կերտման վրա։ Շատերն աշխաատանք ու միջոցներ չունեն ու փնտրում են հնարավորություններ այն երկրներում, որտեղ կկարողանան բարեկեցություն ապահովել»,- Եռաբլուր զինվորական պանթեոնում լրագրողների հետ զրույցում ասաց կաթողիկոսը։

Հարցին՝ ճի՞շտ եք համարում, ՀՀ-ում ներդրումները դրսևորվեն միայն եկեղեցիներ կառուցելով, վեհափառը պատասխանեց․ «Կարծում եմ՝ ավելորդ է այդ հարցումը, որովհետև յուրաքանչյուր անձ, անհատ ունի իր նպատակն ու ցանկությունը ու գործում է դրան համապատասխան, եթե ցանկանում է եկեղեցի կառուցել, չես կարող համոզել այլ շինություն կառուցելու»։

Հարցին, իսկ եթե այդ գումարները օրինական ճանապարհով չեն ձեռք բերվել, Ամենայն Հայոց Կաթողիկոսը նկատեց, թե պետք չէ մերկապարանոց հայտարարություններ անել ու մեղադրանքներ հնչեցնել։

«Եկեղեցին ազնվական, նվիրական զգացումներով են կառուցում, մենք չենք կարող իրավունք վերապահել քննելու, թե ինչ միջոցներով է։ Եթե մեկն անազնիվ ճանապարհով է գումար հայթայթել, գոյություն ունեն համապատասխան կառույցներ, որոնք կարող են այդ երևույթը բացահայտել»,- ասաց նա։

Առավել մանրամասն՝ տեսանյութով։

Սեդա Ղուկասյան