20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Հոգեբանական ճնշման գործողություն է, շանտաժ. փորձագետները՝ S-400-ները Հայաստանի դեմ օգտագործելու հնարավորության մասին
Քաղաքականություն
26.07.2019 | 19:31
Ռազմական փորձագետ Կարեն Վրթանեսյանը հոգեբանական ճնշման գործողություն է համարում ադրբեջանական կողմի տարածած տեղեկություններն այն մասին, որ Հայաստանի և Ադրբեջանի միջև ռազմական գործողությունների վերսկսման դեպքում Թուրքիան ՌԴ-ից ձեռք բերած S-400 համակարգերը կօգտագործի Հայաստանի դեմ:
«S-400-ը հարձակողական զենք չէ: Դրանք տեղադրվում են Անկարայի շրջակայքում՝ Թուրքիայի մայրաքաղաքը պաշտպանելու համար: Ինձ թվում է՝ սա ավելի շատ հոգեբանական ճնշման գործողություն է, որովհետև Անկարայից Հայաստան այն հազիվ թե ինչ-որ բան անի: Խոսքը, հավանաբար, այն մասին է, որ այդ ՀՕՊ համակարգերով, գուցե, հայկական ավիացիոն միջոցներ փորձեն ճնշել, բայց, կրկնում եմ, դրանք տեղադրվում են Անկարայի շրջակայքում: Գոնե այս պահի դրությամբ թուրքական կողմի ծրագիրն այդպիսին է»,- ասաց Կարեն Վրթանեսյանը:
Ռազմական փորձագետը համաձայն չէ տեսակետներին, որ թուրքական կողմի սպառազինությունում S-400-ների առկայության պարագայում չեզոքանում է Հայաստանի «Իսկանդեր»-ներից իրենց սպառնացող վտանգը:
««Իսկանդեր»-ն այդ ՀՕՊ համակարգի միջոցով որսալը բավականին բարդ է: Առավել ևս, եթե այդ հրթիռները Բաքվի վրա են թռնում: Անկարայից Բաքվի վրա թռչող հրթիռը որսալը մի քիչ իրատեսական չէ»,- ասաց փորձագետը:
Վրթանեսյանը նաև կարծիք հայտնեց, որ այսքան աղմուկից հետո վերջապես ձեռք բերված S-400-ները Թուրքիան չի օգտագործի Ադրբեջանի համար. «Թուրքիան շատ մեծ դժվարություններով ձեռք բերեց այդ ՀՕՊ համակարգերը, դրա պատճառով ընկավ ԱՄՆ-ի պատժամիջոցների տակ, մասնավորապես՝ դուրս մնաց F-35 կործանիչների ծրագրից: Եվ, անկեղծ ասած, չեմ կարծում, որ գոնե այս խմբաքանակը՝ 4 դիվիզիոնը, որ ստացավ, Թուրքիան ծախսի Ադրբեջանի համար: Ճիշտ է, Բաքուն Անկարայի դաշնակիցն է, բայց Թուրքիան ավելի առաջնային ու կարևոր խնդիրներ ունի: Ինձ թվում է՝ սրանք ադրբեջանական, այսպես ասած, փորձագետների կողմից քարոզչական գործողություններ են»:
Քաղաքագետ Լևոն Շիրինյանը նույնպես հավանական չի համարում S-400-ները Հայաստանի դեմ կիրառելը, իսկ ադրբեջանական կողմից տարածվող տեղեկությունները շանտաժ է որակում:
«Անիմաստ շանտաժ է, ռազմավարական շանտաժ: Հոգեբանական ճնշման ձև է և տգետ հաշիվ»,- ասաց նա:
Քաղաքագետը նաև բացառում է, որ ինչ-որ տարբերակով S-400-ները կհայտնվեն Ադրբեջանի տարածքում: «S-400-ն ատրճանակ չի, որ գրպանը դնեն, տանեն: Երկրորդ՝ մատակարարող կողմը, երբ այդ մասշտաբի զենք է մատակարարում, որոշակի պայմաններ է դնում: Բացի այդ՝ մենք էլ ռազմավարական նշանակության հրթիռներ ունենք, որոնք կարող ենք օգտագործել»,- ասաց նա:
Լևոն Շիրինյանն առաջարկում է հիմա ուշադիր հետևել Թուրքիա-ԱՄՆ հարաբերություններին. «Հիմա թուրքերն ԱՄՆ-ի հետ պարզելու բան ունեն: Մենք այնքան ուշադիր պետք է հետևենք, որ օգուտներ քաղենք, որովհետև այս կամ այն կերպ մեր շահերը շոշափվելու են: Սա է գլխավոր հարցը»:
