Ինչպես կառավարման խորհրդում հայտնվեցին փոխքաղաքապետն ու իր հարսը․ Արմավիրի մարզի թիվ 5 դպրոցի ծնողական խորհրդի նախագահ

Արմավիրի մարզի թիվ 5 հիմնական դպրոցում ընթացիկ տարվա մայիսին տեղի է ունեցել դպրոցի տնօրենի ընտրություն, որի արդյունքում գործող տնօրենը  3 կողմ, 5 դեմ ձայների հարաբերակցությամբ չի հաղթել։

Չընդունելով ընտրության այս արդյունքները դպրոցի աշակերտների ծնողները նախաձեռնել են բողոքի ակցիա՝ պահանջելով իրենց դպրոցի տնօրեն նշանակել գործող տնօրենին՝ 17 տարի դպրոցում աշխատած Մաշա Իվանյանին։ Դպրոցի ծնողական խորհրդի նախագահը նաև տեղեկացրեց, որ 10 օր առաջ ինքը էլեկտրոնային նամակ է ստացել, ըստ որի՝ նրան ուզում են ենթարկել պատասխանատվության նվազագույն աշխատավարձի 100-ապատիկից 200-ապատիկի չափով՝ որպես շտապ և ինքնաբուխ ցույցերի կազմակերպիչ:

Այսօր հրավիրված մամուլի ասուլիսի ժամանակ ներկայացնելով  այլ մանրամասներ ևս Արմավիրի թիվ 5 հիմնական դպրոցի ծնողական խորհրդի նախագահ Հայաստան Հակոբյանն ասաց, որ ծնողները երթ են անցկացրել դեպի մարզպետարան, հանդիպել են մարզպետի հետ, որից հետո հասկացել են, որ մարզպետը պարզապես չի ցանկանում աշխատել Մաշա Իվանյանի հետ։

«Մարզպետն իրենց ասում է, որ խորհրդի վրա որևէ ուղղորդում չի եղել, բայց  ընտրություններից առաջ հանդիպում եմ մարզպետին, իմ կողքին նստած են կառավարման խորհրդի նախագահը, մարզպետարանի իրավաբանը, դիմացս նստած է կառավարման խորհրդի մյուս անդամը: Մարզպետն ասում է՝ տիկին Իվանյանի կողմից կան չարաշահումներ, և նա այլևս չի կարող պաշտոնավարել: Ի՞նչ եք կարծում, դա ուղղորդում չէ՞, ազդակ չէ՞ իմ կողքին նստած կառավարման խորհրդի նախագահին, որ «գիտեք՝ դուք պետք է չընտրեք նրան, որովհետև ես՝ որպես մարզպետ, հայտարարում եմ, որ այնտեղ կան չարաշահումներ»»,- ասաց Հակոբյանը։

Հակոբյանը նաև հարց հնչեցրեց՝ ինչպես  են կառավարման խորհրդում հայտնվել փոխքաղաքապետի հարսն ու փոխքաղաքապետը և արդյոք դա շահերի բախում չէ:

Հայաստան Հակոբյանը նաև հայտնեց, որ Արմավիրի մարզպետի հրամանով փետրվարի 19-ին խորհրդի փոխված կազմը, ըստ իրենց մոտ եղած փաստաթղթերի, հաստատվել է ժամկետների խախտումով՝ առանց նախարարության ներկայացուցչի։

Աղավնի Սուքիասյան