28.03.2026 | 19:57
Սպասվում են տեղումներ. լեռնային գոտիներում՝ թաց ձյան, նախալեռնային և հովտային գոտիներում՝ անձրևի տեսքով
ՌԴ-ի, Վրաստանի և Իրանի հետ էներգետիկ ցանցերի միավորումը կարելի է ավարտին հասցնել 2-3 տարում. Ավինյան
Տնտեսություն
18.07.2019 | 11:33
ՀՀ փոխվարչապետ Տիգրան Ավինյանը կարծում է, որ, ցանկության դեպքում, Հայաստանի, Ռուսաստանի, Վրաստանի և Իրանի էներգետիկ ցանցերի միավորումը 2-3 տարում կարելի է ավարտին հասցնել: Այս մասին Նյու Յորքում գտնվող փոխվարչապետն ասել է ՌԻԱ Նովոստիին:
«Հիմա մենք բարձրավոլտ էլեկտրահաղորդման գծեր ենք կառուցում Վրաստանի և Իրանի հետ: Տրամաբանությունն այն է, որ մենք, Վրաստանը, Իրանն ու ՌԴ-ն համաձայնեցված աշխատենք ցանցում: Այս համագործակցությունը շատ կարևոր է: Մենք ուզում ենք կառուցել համակարգ, որը թույլ կտա համաձայնեցված աշխատել Ռուսաստանի հետ կամ փոխարկել հաճախականությունները, որպեսզի կարողանանք կապված լինել»,- ասել է Տիգրան Ավինյանը:
Նրա խոսքով՝ ցանցերի միավորման նպատակը մեկ գլոբալ շուկա և գլոբալ էներգետիկ ենթակառուցվածքն ունենալն է:
«Եթե ինտենսիվ աշխատենք, 2-3 տարի անց կունենանք դա»,- նշել է Ավինյանը՝ պատասխանելով ժամկետների մասին հարցին:
Աղբյուրը հիշեցնում է, որ 2015թ. դեկտեմբերին Հայաստանը, Վրաստանը, Իրանն ու Ռուսաստանը քառակողմ հուշագիր ստորագրեցին, որը նախատեսում է բարձրացնել էլեկտրաէներգիայի հոսքի կառավարման, էներգահամակարգերի անվտանգության և հուսալիության մակարդակը:
Հուշագրի շրջանակում ծրագրվում են մի շարք միջոցառումներ՝ ուղղված Հյուսիս-Հարավ էներգետիկ միջանցքի ստեղծմանը, ինչը հնարավորություն կտա աշխատել ԵՏՄ-ի և ԵՄ-ի էներգահամակարգերի հետ:
