Գյումրիում շարունակվում է փողոցաշինությունը․ պատմական կենտրոնում աշխատանքները գրեթե ավարտված են   

Վերակառուցման և զարգացման եվրոպական բանկի տրամադրած 23․8 մլն եվրո արժողությամբ Գյումրիի փողոցաշինական ծրագրի առաջին փուլը նախատեսված էր ավարտել հունիսի 30-ին, իսկ օգոստոսին սկսել 2-րդ փուլը։ Սակայն փողոցաշինական աշխատանքների ընթացքում հայտաբերվել են մի շարք խնդիրներ, այդ պատճառով էլ ժամկետները երկարաձգվել են։ Factor.am-հետ զրույցում Գյումրու քաղաքապետի մամուլի խոսնակ Սոնա Առաքելյանը նշեց, որ աշխատանքների ընթացքում անընդհատ առաջ է եկել  նախագծային փոփոխություններ կատարելու անհրաժեշտություն և դա է աշխատանքների ձգձգման հիմնական պատճառը:

«Որոշ փողոցներում աշխատանքները մոտենում են ավարտին, իսկ մի քանի փողոցներում դրանք ընթացքի մեջ են, իրականացվում են հենասյուների հիմքերի, եզրաքարերի տեղադրման, ջրահեռացման համակարգերի, մալուխների անցկացման, մայթերի ասֆալտապատման աշխատանքներ:  Բարձրավոլտ, ցածրավոլտ մալուխներ անցկացվեցին, կան օբյեկտիվ պատճառներ աշխատանքների ձգձգման մասով, դրանք ուսումնասիրվում և քննարկվում են բանկի հետ»,- ասաց Սոնա Առաքելյանը։

Փողոցաշինական ծրագրի առաջին փուլով միայն Վերակառուցման և զարգացման եվրոպական բանկի միջոցներով հիմնանորոգվում է 12 փողոց ու 2 հրապարակ, քաղաքի պատմական միջուկում էլ աշխատանքները գրեթե ավարտված են։

«Գյումրու պատմական կենտրոնում փողոցաշինական աշխատանքները գրեթե ավարտված են, Երևանյան խճուղում այս պահին իրականացվում են մանրահատակ ասֆալտի շերտի տեղադրման աշխատանքներ՝ 6 սմ հաստությամբ: Շիրազի փողոցի (հիմնանորոգվել է Համաշխարհային բանկի ֆինանսավորմամբ),  դրան հարակից 4 փողոցների հիմնանորոգման աշխատանքներն են գրեթե ավարտված, Գայի փողոցի աշխատանքներն են ավարտվել (հիմնանորոգվել է Համաշխարհային բանկի ֆինանսավորմամբ)։ Նաև Գարեգին Նժդեհի հրապարակն է վերակառուցվելու, որի նախագիծն արդեն հաստատվել և տրամադրվել է շինարարին: Շրջանաձև երթևեկության կազմակերպմամբ պայմանավորված՝ Գարեգին Նժդեհի հրապարակում կառուցվելու է երթևեկության անվտանգության կղզյակ»,- ասաց Սոնա Առաքելյանը։

Գյումրու քաղաքապետի մամուլի խոսնակն ընդգծեց, որ փողոցաշինական աշխատանքների ընթացքը վարչապետ Նիկոլ Փաշինյանի ուշադրության կենտրոնում  է։ «Իհարկե, փողոցաշինական ծրագիրը տարածքային կառավարման նախարարության, քաղաքաշինության կոմիտեի ուշադրության կենտրոնում է: Փողոցաշինական աշխատանքների մասով հաճախակի անցկացվում են խորհրդակցություններ:  Հունիսի 26-ի խորհրդակցությունը գլխավորում էր քաղաքաշինության կոմիտեի նախագահի առաջին տեղակալ Արմեն Ղուլարյանը»,- նշեց Սոնա Առաքելյանը։

Իսկ թե երբ կավարտվեն առաջին փուլի փողոցաշինական աշխատանքները,  հստակ ժամկետներ չկան։ Սեպտեմբերի 21-ի՝ Հայաստանի անկախության օրվա գլխավոր տոնակատարությունները Գյումրիում են անցկացվելու, ենթադրելի է, որ մինչ այդ փողոցաշինական ախատանքները պետք է ավարտված լինեն։

Նշենք, որ Գյումրիի փողոցաշինական աշխատանքներն իրականացվում են Վերակառուցման և զարգացման եվրոպական բանկի, Համաշխարհային բանկի ֆինանսավորմամբ, համայնքային բյուջեի միջոցներով ևս իրականացվում են աշխատանքներ: Գյումրիում կա ընդհանուր 180 փողոց, որից 40-ից ավելին կհիմնանորոգվի։ Միայն Վերակառուցման և զարգացման եվրոպական բանկի ծրագրի երկրորդ փուլով նախատեսվում է 34 փողոցի հիմնանորոգում:

Էմմա Չոբանյան