Քիչ առաջ Վանաձորում ծառի հաստ ճյուղը կոտրվել ու ընկել է Տիգրան Մեծ հասցեում կայանած «Մերսեդես» մակնիշի մեքենայի վրա: Բարեբախտաբար մեքենայում մարդ չի եղել, մեքենան էլ լուրջ վնասներ չի կրել:
Մեկ այլ ծառ էլ ընկել է Բաղրամյան պողոտայում: ԱԻՆ ԼՄՓՎ-ից տեղեկացրին, որ ծառի ընկնելու հետևանքով զոհեր և վիրավորներ չկան: Վնասվել են միայն էլեկտրալարերը, ճանապարհն էլ դարձել է անանցանելի:
Վանաձորի քաղաքապետարանի կոմունալ տնտեսության, բարեկարգման և շրջակա միջավայրի պահպանության բաժնի պետ Կարեն Պառավյանը տեղեկացրեց, որ այս պահին նշված երկու տարածքում էլ իրենք աշխատանքներ են իրականացնում. «Ծառերը ոչ մեկը չորացած չեն եղել, կարող է բնական թուլություն են ունեցել ու քամու հետևանքով ընկել են: Մեր «Նեցուկ» ՀՈԱԿ-ի աշխատողները գնացին, որպեսզի ճյուղը հեռացնեն տարածքից: Մեքենայի վրա ընդամենը փոքր խազեր են եղել, ներկն է մաքրվել, այլ վնասներ չկան: Վարորդն էլ բողոքներ չուներ: Այս պահին հիմնական կազմով աշխատում են Բաղրամյան պողոտայի վրա, որովհետև այնտեղ մեծ բարդի ծառ է ընկել: Փակվել էր փողոցի երթևեկելի հատվածը»:
Factor.am-ը փորձեց պարզել, թե նշված դեպքերում, երբ մեքենան վնասվում է, ո՞վ է փոխհատուցում վարորդի ծախսերը, Վանաձորի «Սիլ Ինշուրանս» ապահովագրական ընկերության տնօրեն Վահե Կռոյանն ասաց. «Ավտոմեքենան պետք է ունենա «Կասկո» պայմանագիր, որպեսզի ինքը ստանա փոխհատուցում: Հակառակ պարագայում ինքը չի կարողանա դիմել ապահովագրական ընկերություն, որպեսզի ստանա հատուցում: Իսկ եթե ինքն ունի ԱՊՊԱ պայմանագիր, այդ պարագայում չի հատուցվում, որովհետև այդ պայմանագիրը հատուցում է միայն երրորդ անձին: Այդ դեպքում պետք է դիմեն քաղաքապետարան, կոմունալ բաժինը պետք է որոշում կայացնի հատուցում տալի՞ս են, թե՝ ոչ»:
Տաթևիկ Ղազարյան
