Արցախի ներգրավվածությունը բանակցային գործընթացին, մեր կարևորագույն նախապայմաններից է․ Զոհրաբ Մնացականյան. ՏԵՍԱՆՅՈՒԹ

Արցախի իշխանությունների խորքային ներգրավվածությունն արցախյան հակամարտության խաղաղ կարգավորման գործընթացին մեր կարևորագույն նպատակներից մեկն է։ Այս մասին այսօր Արցախի նախագահ Բակո Սահակյանի հետ հանդիպումից հետո լրագրողների հետ ճեպազրույցում նշել է Հայաստանի արտաքին գործերի նախարար Զոհրաբ Մնացականյանը։

«Բանակցային գործընթացը շարունակական է, և Հայաստանը, որպես դրա մասնակից, երբևէ չի հապաղել և այն չի դանդաղեցրել, ինչը  ցույց է տալիս մեր լրջությունը»,- ընդգծել է նախարարը։

Ըստ նրա՝ եթե հարցը հեշտ լիներ, վաղուց լուծված կլիներ:

«Սա օրակարգային հարց է, որը կանոնավոր և հետևողականորեն հետապնդվում է, որովհետև մենք ունենք գերակա խնդիր։ Սա պրագմատիկ մոտեցում է, և եթե մենք լիարժեք ու խաղաղ կարգավորման արդյունավետ բանակցային գործընթացի մասին ենք խոսում, ապա հաշվի չառնել Լեռնային Ղարաբաղի ներգրավվածության կարևորագույն  գործոնն ու սեփականության զգացումի ամրապնդումը, պրակտիկորեն նշանակում է վնաս  հասցնել խաղաղ կարգավորման գործընթացի արդյունավետ աշխատանքին»,- նշել Մնացականյանը։

Նախարարը լրագրողներին հիշեցրեց Ստեփանակերտում տեղի ունեցած Անվտանգության խորհուրդների համատեղ նիստի մասին։

«Նիստի ժամանակ բոլորս խոսել ենք այս հարցի մասին և ասել, որ Արցախի ներգրավվածությունը երբևէ որպես նախապայման առաջ չենք բերի, բայց նաև չենք կարող հաշվի չառնել, որ սա կոնկրետ հարց է, որն արհամարհելն անհնար է»,- եզրափակեց ՀՀ ԱԳ նախարարը:

Նելլի Մելքոնյան