Չեմ հիշում ՀԱՊԿ նախարարական խորհրդի ոչ մի նիստ, որտեղ չքննարկվեր ԼՂ հակամարտությունը. Վալերի Սեմերիկով

Չեմ հիշում ՀԱՊԿ անդամ պետությունների նախարարական խորհրդի ոչ մի նիստ, որտեղ չքննարկվեր ԼՂ հակամարտության հարցը: Հուլիսի 4-ին կազմակերպված Մոսկվա-Երևան-Մինսկ-Նուր Սուլթան տեսակամուրջի ժամանակ այս մասին ասել է ՀԱՊԿ գլխավոր քարտուղարի ժամանակավոր պաշտոնակատար Վալերի Սեմերիկովը՝ պատասխանելով հայ լրագրողների հարցին, թե ի՞նչ միջոցներ են ձեռնարկվել ՀԱՊԿ-ի կողմից՝ ղարաբաղյան հիմնախնդրի շրջանակում գոյություն ունեցող և հնարավոր սպառնալիքները կանխելու և մարտահրավերներին դիմակայելու համար:

Սեմերիկովի խոսքով՝ այդ հարցով մինչ այժմ մի քանի հայտարարություն է ընդունվել՝ ինչպես Հավաքական անվտանգության խորհրդի, այնպես էլ ԱԳ նախարարների մակարդակով:

Լրագրողների հարցին ի պատասխան՝ Վալերի Սեմերիկովը նաև տեղեկացրել է, որ Ադրբեջանը ՀԱՊԿ-ին անդամակցելու հայտ, այս պահի դրությամբ, չի ներկայացրել՝ չնայած ադրբեջանական մամուլում այդ մասին հրապարակումներին: Սեմերիկովը, միաժամանակ, հավելել է, որ հայտի բացակայության արդյունքում կազմակերպությունում այդ թեմայով քննարկումներ չեն եղել:

ՀԱՊԿ գլխավոր քարտուղարի պաշտոնակատարը չի բացառել, որ դա կարող է ինչ-ինչ նպատակներ հետապնդող տեղեկատվական հոսք լինել: Նա, միաժամանակ, հիշեցրել է, որ ՀԱՊԿ-ն կանոնակարգ և պահանջներ ունի, և կազմակերպությանն անդամակցել ցանկացող պետությունը պետք է համապատասխանի դրանց:

Անդրադառնալով ՀԱՊԿ առաջիկա ծրագրերին՝ Վալերի Սեմերիկովը տեղեկացրել է, որ կազմակերպության անդամ պետությունների պաշտպանության նախարարներն ու անվտանգության խորհուրդների քարտուղարները հաստատել են 2020 թվականի համար Հավաքական անվտանգության ուժերի և համակարգի միջոցների համատեղ պատրաստման պլանը, ճշգրտումներ են մտցվել 2019 թվականի պլանում:

2019 թվականին, բացի տարատեսակ հրամանատարաշտաբային զորավարժություններից և վարժանքներից, վեց զորավարժություն կանցկացվի: «Զորավարժությունները կանցկացվեն չորս պետություններում՝ Ղրղզստանում, Տաջիկստանում, Ռուսաստանում և Բելառուսում: Դրանցում կներգրավվի, ընդհանուր առմամբ, 12 հազար մարդ»,- ասել է ՀԱՊԿ գլխավոր քարտուղարի պաշտոնակատարը։