04.02.2026 | 23:29
ՇՄ նախարարը և Դևիդ Կուպերը քննարկել են «Կենսաբանական բազմազանության մասին» կոնվենցիայի ներքո ընթացող գործընթացներ
Իրանը պատրաստվում է միջուկային գործարքով նախատեսվածից ավելի մեծ ծավալով ուրան հարստացնել
Քաղաքականություն
03.07.2019 | 20:42
Թեհրանը հուլիսի 7-ից կհրաժարվի Արաքում ռեակտորի փոխարկումից և այն կվերադարձնի նախկին վիճակին, որի դեպքում հնարավոր է պլուտոնիումի արտադրությունը։ Դա կլինի այն պարագայում, եթե միջուկային գործարքի կողմերը չկատարեն իրենց պարտավորությունները։ Այս մասին հայտարարել է Իրանի նախագահ Հասան Ռոհանին, գրում է ՌԻԱ Նովոստին։
«Հուլիսի 7-ից ուրանի հարստացումն այլևս չի լինի 3.67% մակարդակի վրա: Մենք մի կողմ կդնենք այդ պարտավորության կատարումը և այն 3.67%-ից կբարձրացնենք այնքան, որքան մեզ անհրաժեշտ լինի»,- ասել է Հասան Ռոհանին:
Ատոմային էներգիայի միջազգային գործակալությունը Թեհրանի հայտարարությունից հետո հաստատել է, որ Իրանը 300 կգ-ով ավելացրել է հարստացված ուրանի պաշարը։ Մինչ այդ, Իրանը նշում էր, որ չի պատրաստվում կատարել հարստացված ուրանի պաշարների պահպանման շուրջ պարտավորությունները:
ՌԴ ԱԳ փոխնախարար Սերգեյ Ռյաբկովը, մեկնաբանելով իրավիճակը, հայտարարել է, որ Իրանի այս քայլն անսպասելի չէ, քանի որ 300 կգ-անոց «բեռը» վերաբերում է միջուկային գործարքի շրջանակում Իրանի կողմից կամավոր ստանձնած պարտավորություններին։
Նելլի Մելքոնյան
